Hontzak hitzaldia antolatu du Durangon hegazti migratzaileei buruz Museoen Nazioarteko Egunean

MUGA MUSEOAK

Museoen Nazioarteko Eguna dela eta, Hontza Museoak hitzaldi berezi bat antolatu du maiatzaren 21ean. Hitzaldiaren izenburua “Hegazti migratzaileak Euskal Herritik” izango da, eta hizlaria Edorta Unamuno Mirandona biologoa izango da.

Edorta Unamuno. HONTZA

Edorta Unamuno Mirandona biologoa da eta gaur egun Urdaibai Bird Center-eko komunikazio, dibulgazio eta hezeguneen kudeaketako proiektuen koordinatzailea da. Hegaztien migrazioaren eta habitat naturalen inguruko ikerketa eta dibulgazio lanetan urte luzez aritu da, eta 2007tik hegaztien eraztunketa zientifikoan aditua da, Urdaibaiko Biosfera Erreserbako hainbat eraztunketa estaziotan lanean arituta.

Saioan zehar, hegazti migratzaileen migrazio-bideak, Euskal Herriak bide horietan duen garrantzia eta gure lurraldetik igarotzen diren espezie nagusiak azalduko dira. Halaber, migrazioaren fenomenoa ulertzeko gakoak eta hegazti hauek kontserbatzeko beharra azpimarratuko dira.

Hitzaldiaren helburua natur ondarearen dibulgazioa sustatzea eta herritarrak hegaztien migrazioaren fenomenoaren inguruan sentsibilizatzea da. Doakoa izango da, eta ez da aldez aurretik izena eman beharko; bertaratzea librea izango da lekua bete arte.