Palestinaren aldeko jaialdi solidarioa Durangoko gaztetxean ekainaren 6an

MUGA ELKARTASUNA

Ekitaldi solidarioa izango da, ekainean Durangora iritsiko diren palestinar gazteei harrera egiteko eta harrera hori kudeatzeko baliabideak lortzeko. Durangaldea Palestina Koordinadorak antolatuta, «Palestinaren aldeko jaialdia» ospatuko da datorren ekainaren 6an, larunbata, Durangoko Gaztetxean (Montorreta kalean).

Egun osoko egitaraua prestatu dute adin guztietako herritarrentzat, eta bertan ekintza ugari egongo dira: ipuin kontalariak, kontzertuak, janaria eta liburuak. Gainera, antolatzaileek iragarri dutenez, beste hainbat sorpresa ere egongo dira jaialdian zehar.

Ekimen honen helburu nagusia elkartasuna da; horregatik, jaialdian lortutako irabazi guztiak ekainean iritsiko diren gazte palestinarren harrera kudeatzeko erabiliko dira. Kartelak, sinbolikoki, «Palestina aske izango da» (Palestine will be free) mezu indartsua zabaltzen du.

Antolatzaileek dei egin diete herritarrei jaialdian parte har dezaten, mezu argi batekin: «Anima zaitezte etortzera!».