Durangoko Udalak Benita Uribarrena borrokalari antifrankista omenduko du bere jaiotzaren mendeurrenean
Benita Uribarrena. Marina Fuster (Mugalari.info)
Martxoaren 16an Benita Uribarrena Bollain (Durango, 1922 – Le Soler, 2011) borrokalari antifrankistak 100 urte beteko zituen. Hori dela eta, Durangoko Udalak omenaldia egingo dio Bigarren Mundu Gerran Frantziako Erresistentzian parte hartu zuen eta horregatik kondekoratua izan zen emakume durangar honi.
Benita Uribarrena Durangon. Marina Fuster (Mugalari.info)
Ekitaldia datorren asteazkenean egingo da, martxoaren 16ean, 18:00etan, Benita Uribarrena parkean. Euria eginez gero, parkearen mutur batean dagoen Arte eta Historia Museoan ospatuko da. Omenaldian herriko emakume ezberdinek parte hartuko dute, musika, bertso eta dantzaren bidez, besteak beste.
“Durangon hainbat arlotan erreferentzialak diren emakume handiak ditugu, hala nola Benita Uribarrena borrokalari antifaxista. 15 urte zituela alde egin behar izan zuen Durangotik, gure herriaren aurkako 1937ko bonbardaketen ondorioz. Ordutik behar gehien zutenen alde borrokatu zen, frankismoaren aurkako emakumeen borrokaren ikur bihurtuz”, adierazi dute Ima Garrastatxu alkateak eta Julian Rios alkateordeak.
Benita bere familiarekin. Marina Fuster (Mugalari.info)
Frantziak kondekoratua
Bere ama, Benita Bollaín Bilbao, komunista izan zen, eta Durangoko Ezkurdi plazan prentsa-kiosko bat zuen. Horregatik deitu zioten «Benita Kazetaria». II. Errepublikaren aldarrikapena aurreratu zuena izan zen, eta horregatik atxilotu zuten.
Benita lau anai arrebetan gazteena zen. 15 urterekin Durangotik joan behar izan zuen bere ahizpa batekin eta amarekin batera, 1937ko martxoaren 31n herri honek jasan zituen bonbardaketen ondoren. Hirurak urte horretako ekainean iritsi ziren Frantziara.
‘Carte de combattant volontaire de la Résistance». Marina Fuster (Mugalari.info)
1944an Frantziako Erresistentzian sartu zen, eta urtebete geroago atxilotu zuten, ustez dirua eta paper konprometigarriak aurkitu zizkiotelako. Hilabete baino ez zuen eman kartzelan. 2000. urtean Frantzian kondekoratua izan zen Erresistentziako kide gisa.
Uribarrena Le Solerren (Frantzia) bizi izan zen bere bizitzaren zatirik handienean. Beste lan batzuen artean, erbesteratuta egon zen Pau Casals biolontxelo-jole katalanaren etxean lan egin zuen.
Benita Uribarrena parkearen inaugurazioa. Iban Gorriti
1989ko maiatzaren 12an, 52 urteren ondoren, Durangora itzuli ahal izan zen lehen aldiz. 2017az geroztik, udalerriak parke bat du bere izenean, eta bertan egingo da omenaldia. Bertan, Frantzian bizi den alabak bidalitako lore sorta bat utziko da haren omenez.
Parkea. Iban Gorriti
