Eskolatik antzokira joan dira beste behin, ikasleen artean antzerkiaz gozatzeko ohitura sustatzeko Elorrion

Antzerkia eta euskara erakusteko eta haur eta gazteekin lotutako gai sozialak jorratzeko helburua du ‘Eskolatik antzokira’ topaketak. 900 ikasle inguru hurbiltzen dira urtero Arriola antzokira.​

Miñan.

Arriola Antzokiak, Elorrioko Udaleko Euskara Sailarekin batera, 22 urte daramatza Elorrioko ikastetxe guztietako ikasleekin topaketak egiten, helburua antzerkia hurbiltzea, erakustea eta gozatzea izanik. Kanpaina Udalaren eta Arriola Antzokiaren artean finantzatzen da. Antzerki emanaldiak euskaraz dira beti, eta ikasleekin zerikusia duten gai sozial desberdinak jorratzen dituzte (bullinga, beldurrak, sare sozialak, seme-alaben eta gurasoen arteko harremanak, natura, aisialdia, etab.).

Adin-tarte bakoitzari egokitutako hiru ikuskizun eskaintzen dira urtero, gai desberdinekin: alde batetik, 4 eta 7 urte bitarteko ikasleak; bestetik, 8 eta 11 urte bitarteko ikasleak; eta azkenik, DBHko ikasleak. Eskola-orduetan egiten dira, azkenaldian udazkenean. Ikastetxeekin aurrelanketa egiten da: behin ziklo bakoitzerako kontratatuko diren antzerki-proposamenak jakinarazita, fitxa pedagogiko batzuk bidaltzen zaizkie ikastetxean lantzeko. Eta, batzuetan, ikasleen eta aktoreen arteko topaketak egiten dira, antzezpena eta edukiak baloratzeko.

Topaketa horien helburu nagusia haurrak eta gazteak antzerkira joateko ohiturak sortzea izango litzateke. Izan ere, adin tarteen arabera joerak desberdinak direla aipatu dute Arriola antzokitik, fideltasuna lortzea zaila izanik: “3 eta 9 urte bitartean, haurrak antzerkira eta zinemara joaten dira (batzuetan gurasoekin eta beste batzuetan lagun koadrilarekin), baina hortik aurrera eta 25-30 urtera arte oso puntuala da bertaratzea (Break on Stage, Akadantz, 24 Ordu Digitalean, modako filmen bat…). Mugikorrak eta sare sozialak dira haurren eta gazteen aisialdiko protagonistak, eta, jakina, baita kirola ere (futbola, errugbia…)”.

Aurten programatu diren obrak honako hauek izan dira:

* 4 eta 7 urte bitarteko ikasleentzat

Antzezlana: “Kontukantari 3, ZIMURREN ARTEAN KONTUKANTARI ”

Konpainia: LAENANANARANJA

* 8 eta 11 urte bitarteko ikasleentzat:

Antzezlana: “MUNDUA PITZATUTA DAGO BAINA HANTXE GABILTZA OINEZ “

Konpainia: TANTTAKA TEATROA

* DBH-ko ikasleentzat (12-16 urte):

Antzezlana: “MIÑAN”

​Konpainia: ARTEDRAMA​