Atxondok Artisautza eta Nekazaritza Azoka ospatuko du igandean, eta arrastian ‘Euskaldungak’ antzerkiaz gozatzeko aukera

Datorren abenduaren 1ean, Atxondoko Udalak eta Atxondo Kultura Mahaiak antolatutako Artisautza eta Nekazaritza Azoka ospatuko da Apatan. Azoka 11:00etatik 14:30etara izango da eta 30 postu inguru batuko dira, gehienak artisautzakoak, bertako produktuen eskaintza zabalarekin.

Euskaldungak: Maite López eta Aroa Blanco.

Artisautza postuak frontoian egongo dira, eta nekazaritza arlokoak, berriz, plazan, ogia, gazta eta gozogintza bezalako elikagaiekin. Gainera, udaletxeko arkupean, Atxondoko Talogileen taloak probatzeko aukera egongo da, eta Atxondo Harrera Herriko gazte batek gaztaina erreak eskainiko ditu plazan. Jarduerak goiz eta arratsaldez Azokak adin guztientzako jarduera osagarriak barneratuko ditu. 11:30etik 13:30era, Txatxilipurdi aisialdi taldeak mota guztietako jolasak antolatuko ditu, zaharrak zein garaikideak, haur eta familientzat.

«JAI-GIRO PAREGABEA»

Azkenik, 18:00etan, eskolako gimnasioan Euskaldungak -Maite López eta Aroa Blancorekin- antzezlana taularatuko da. Antzezlanean euskaldun berrien eta euskaldun zaharren artean ohikoak diren egoerak antzeztuko dira, seguruenik ikuslearentzat ezagunak diren egoerak. Ekitaldi hauek egun bi geroago, abenduaren 3an, izango den Euskararen Nazioarteko Egunaren harira antolatutakoak dira.

«Laburbilduz, Atxondok herriko kulturaz, tradizioaz eta zaporeez gozatzeko jai-giro paregabea eskainiko du igandean», adierazi dute Udaletik.