Durangoko Merinaldearen Amankomunazgoak kudeatzen duen Landakoko atletismo pista berriztuko da

· 2019an Bizkaiko Foru Aldundiak Durangoko atletismo pistako tartana aldatzeko lanak finantzatuko ditu

Durangoko Merindadeko Amankomunazgoko arduradunak legegintzaldi osoan zehar  hainbat aldiz batzartu dira Aldundiko ordezkariekin Landakoko Atletismo Pistako egoeraren berri emateko eta bertako tartana aldatzeko lanak egin ahal izateko laguntza tekniko eta ekonomikoa eskatzeko. Amankomunazgoko ordezkarien ustetan proiektuaren dimentsioagatik ezinbestekoa da erakunde ezberdinen arteko lankidetza inbertsio honi aurre egiteko.

Amankomunazgoak kudeatzen duen atletismo pista txapelketak egiteko homologatua dago, eta eskualdeko hainbat taldek erabiltzen dute beraien eguneroko jardunean. Gainera, aldian-aldian hainbat lehiaketa antolatu ohi dira bertan; Bizkaia mailan erabilera handiena duen pista da autonomi erkidego mailako txapelketak ere egiten dira bertan.

TARTANA · Instituzio arteko lankidetzaren berria poz handiz jaso du Durangoko Mankomunitateko Gobernu taldeak, izan ere Bizkaiko Foru Aldundiak tartanaren aldaketa finantzatzea Durangaldearentzat oso berri ona da. Honezaz gain, pista egoera onean izateak erreferenteak diren lehiaketak erakar ditzake, eta horrek Durangori, eta bide batez eskualde osoari balio erantsia ematen dio. Azkenik, Durangaldeko Merinaldearen Amankomunazgoko ordezkariek nabarmendu nahi izan dute  “neurri handi baten Landakoko pista erabiltzen duten eskualdeko atletismo taldeak izan dira berri pozgarri hau posible egin dutenak, etengabe pistaren egoeraz ohartu eta pista aldatzeko lanak egiteko eskatu dutelako. Bestalde, Bizkaiko Atletismo Federazioari ere eskerrak eman nahi dizkiogu prozesuan beti bidelagun izan delako”.