Magrebeko, El Salvadorreko eta Indiako emakumeen errealitatea erakutsiko du Amorebieta-Etxanok

Mugalari

· «Hegoaldeko eta Iparraldeko emakumeak. Indiako, El Salvadorreko eta Magrebeko esperientziak” jardunaldia ekainaren 7an egingo da

· Hitzordua Zelaietako Auditorian izango da, 18:00etatik 20:00etara

Amorebieta-Etxanoko Berdintasun Sailak topaketa hau antolatu du datorren asteazkenean, ekainak 7: “Hegoaldeko eta Iparraldeko emakumeak. Indiako, El Salvadorreko eta Magrebeko esperientziak”. Jardunaldia Zelaieta Auditorian egingo da, 18:00etatik aurrera, eta helburu izango du herrialde horietako emakumeen lana eta esperientzia eta errealitate batzuen bilakaera ikustaraztea.

Magrebeko emakume bat, M’Zik herrian. · ARGAZKIA · Iban Gorriti

Jardunaldia Emakumeen Osasunaren aldeko Ekintzaren Nazioarteko Egunaren harira antolatu da, maiatzaren 28a, eta bertan aurkeztuko dira Indian, El Salvadorren eta Magreben emakumeentzat abiatu diren burujabetze-programa batzuk, udalak finantzatutakoak. Alfabetatzeari, produkzio-tailerrei eta mikrokredituei lotuta daude, baita muturreko pobrezian dauden inguruetako emakumeen prebentzio-osasunari ere.

Jardunaldian izango dira Sarai Martín, Parekideko zuzendaria, eta Amparo Estellés, Amanecer Solidarioko presidentea. Bestalde, orain dela bi urte Amorebieta-Etxanoko Udalaren babesaz burujabetze-prozesu bat hasi zuten Magrebeko emakume-talde batek bere esperientziak aurkeztuko ditu.

Jardunaldia amaitzeko, Durga Poudel-ek, nepaldarra, Bollywoodeko dantza-ikuskizuna eskainiko du.