Ipuinak, jolasak eta sormena izango dira Amorebietako Neguleku Irekiak programaren ardatz

MUGA AMOREBIETA-ETXANO

Amorebieta-Etxanoko Neguleku Irekiak programak ipuinak, sormena eta jolasa uztartuko ditu Gabonetako oporretan. «Bazen behin» izango da 2026ko edizioaren ardatza, eta haurrei zuzendutako proposamenak aisialdia, irudimena eta beste haur batzuekiko harremana sustatuko ditu. Besteak beste, jolasak eta tailerrak egingo dituzte, eta BECeko Gabonetako Haur Parkera irteera ere izango dute egitarauan.

Zelaieta zentroan egingo den ekimena 2016 eta 2022 artean jaiotako haurrei zuzenduta dago. Guztira, bost jardunaldi eskainiko dituzte: abenduaren 28an, 29an eta 30ean eta urtarrilaren 4an eta 5ean. Programaren bidez, haurrek oporraldian jarduera ludiko eta hezitzaileetan parte hartzeko aukera izango dute, sormenari eta elkarbizitzari tartea eginez.

Jarduerak txanda bakarrean egingo dituzte, 9:30etik 13:30era, eta parte-hartzaileak bi adin-talderen arabera antolatuko dituzte: 2019 eta 2022 artean jaiotakoak eta 2016 eta 2018 artean jaiotakoak. Familiei begira, zaintza-zerbitzua ere eskainiko dute 9:00etatik 9:30era eta 13:30etik 14:00etara. Zerbitzu hori izen-ematean eskatu beharko da.

Izen-ematea azaroaren 4tik 18ra

Familiek azaroaren 4tik 18ra izango dute izena emateko aukera, udalaren www.amorebieta-etxano.eus webgunearen bidez edo Gazte Informazio Bulegoan, aurrez aurre, 11:00etatik 13:00etara eta 17:00etatik 20:00etara.

Izen-ematea banaka edo gehienez hiru haurrez osatutako taldeetan egin ahal izango da, baina haur bakoitzak bere eskaera aurkeztu beharko du. Taldean izena emateak ez du bermatuko haur guztiak jarduera-talde berean egotea, antolaketa ikasturtearen arabera egingo baita. Parte hartzeko, Ametx txartela aktibatuta izatea ezinbestekoa izango da.

Plazak mugatuak izango dira, eta eskariak eskaintza gainditzen badu, zozketa egingo dute. Plazarik lortzen ez dutenak itxaron-zerrendan sartuko dira. Dibertsitate funtzionala duten eskatzaileen kasuan, adin-tartea bi urtez malgutzeko aukera ere aurreikusi dute.

Prezioa eta hobariak

Programan parte hartzeko prezioa 54,50 eurokoa izango da haur bakoitzeko. Udal-ordenantzan jasotako hobariak aplikatu ahal izango dira, familia-errentaren araberako murrizketak eta anai-arrebentzako deskontuak barne: % 20 bigarren anai-arrebarentzat eta % 30 hirugarrenarentzat.

Hobariak eskatu nahi dituzten familiek izen-emate epearen barruan egin beharko dute eskaera, diru-sarrerak egiaztatzeko dokumentazioa aurkeztuta, Herritarren Arreta Zerbitzuan.