Oilar Beltzak, Mugi Panderoa, Corazón Oxidado, Nafarroa 1512 eta Naxker, Urriko Jaietan
MUGA MALLABIA
Mallabiak urriaren 23an eta 24an doako bost kontzertu hartuko ditu 2026ko Urriko Jaien barruan, Mallabiko Udalak eta Jai Batzordeak antolatuta. Kontzertuak herriko parkean egingo dira, estalitako karpa batean, eta larunbatean gaueko autobus zerbitzu berezia jarriko da martxan, inguruko herrietatik joan-etorriak errazteko eta jaietan ibilgailu pribatuaren ordezko garraiobideak sustatzeko.
Musika-egitaraua urriaren 23an, ostirala, 22:00etan hasiko da, Oilar Beltzak eta Mugi Panderoa taldeen emanaldiekin. Bi taldeek erromeria eskainiko dute herriko parkean.
Urriaren 24an, larunbata, Corazón Oxidado (Fito & Fitipaldis taldearen omenezko taldea), Nafarroa 1512 eta Naxker taldeen txanda izango da. Emanaldiak herriko parkean egingo dira, eta guztiak doakoak izango dira. Gainera, estalitako karpa batean egingo dira, eguraldiak eraginik izan ez dezan eta bertaratutakoek musikaz gozatzeko aukera izan dezaten.
Gaueko autobus zerbitzu berezia
Larunbateko kontzertuak direla eta, gaueko autobus zerbitzu berezia jarriko da martxan, Mallabia eta Ondarroa lotzeko, Ermua, Eibar, Elgoibar, Altzola, Mendaro, Deba eta Mutrikun geldialdiak eginez.
Zerbitzuak joan-etorriko hainbat ordutegi eskainiko ditu gauean eta goizaldean. Mallabiatik Ondarroarako autobusak 23:00etan, 00:40an, 02:40an, 04:40an eta 05:40an irtengo dira; Ondarroatik Mallabiarakoak, berriz, 21:20an, 22:10ean, 23:15ean, 23:45ean, 01:45ean, 03:45ean eta 05:45ean. Gainera, Euskotrenekin loturak aurreikusi dira Ermuko geltokian.
Ordutegi guztiak, tarteko geldialdiak barne, zerbitzuaren informazio-kartelan jasota daude. Gogorarazi behar da urriaren 24tik 25erako goizaldean ordu-aldaketa ofiziala izango dela; hortaz, 03:00etan 02:00ak izango dira berriro. Egoera hori kontuan hartu da autobus zerbitzuaren ordutegiak antolatzerakoan.
Ekimen honen bidez, Mallabiko Udalak kontzertuetara joatea erraztu eta mugikortasun seguruagoa eta jasangarriagoa sustatu nahi du, jaietan parte hartzera datozen pertsonei garraio alternatibak eskainiz.
