Lorreine, Dorre, Sweet Rage eta Black Moon, Plateruena-Izar Records lehiaketako sarituak

MUGA DURANGO

Plateruena – Izar Records musika-lehiaketaren lehen edizioa amaitu da. Durangoko Udalak eta Izar Recordsek elkarlanean antolatutako lehiaketa joan den maiatzean abiatu zen, eta hamar zuzeneko kontzertuen bidez garatu da. Guztira, 40 taldek eman zuten izena, eta horietatik 30ek lehiaketan parte hartzeko eskatutako gutxieneko kalitatea gainditu zuten.

Dorre.

Irailaren 26an ospatutako finalera Lorreine, Dorre, Sweet Rage, Alerta Petrov eta Slide iritsi ziren, eta sari-banaketa horrekin eman zitzaion amaiera lehiaketaren lehen edizioari.

Lorreinek hamar kantuko LP bat grabatzeko saria eskuratu zuen, bost grabazio-egun, hamar nahasketa-egun eta masterizazio-egun bat barne. Dorrek, berriz, bost kantuko EP bat grabatzeko saria jaso zuen, hiru grabazio-egun, bost nahasketa-egun eta masterizazio-egun bat barne.

KOBA SARIAK

Metal talderik onenari zuzendutako Koba Saria berdinduta amaitu zen. Sweet Rage eta Black Moon izan ziren kategoria horretan saritutako taldeak, eta biek joko dute 2027ko Koba festibalean.

Dorrek, gainera, Durangaldeko talderik onenaren saria jaso zuen. Sariak 2026ko San Fausto jaietan kontzertu bat eskaintzea eta 600 euroko diru-saria jasotzea biltzen ditu. Eszenaratze onenari Izar Records Saria, I See Explosions taldeak eskuratu zuen, bideoklip bat eta single bat grabatzeko aukerarekin. Momakek, berriz, soinu onenaren Txirula Saria jaso zuen.

Sweet Rage.

Maiatzetik hona egindako hamar kontzertuek parte hartu duten taldeen talentua ezagutzeko aukera eman dute, lehiaketaren helburuekin bat eginez, tokiko musika-sorkuntza bultzatzea, proiektu artistiko berriei ikusgarritasuna ematea eta Durangoko zein Euskal Herriko kultura-bizitza aberastea.

Bigarren denboraldia prestaketa fasean da jada, lehenak izan duen arrakastaren ostean.