Mallabiko Udalak bat egin du ‘Egin nirekin ere euskaraz’ kanpainarekin, herritar arrazializatuen ahalegina ikusarazteko

Mallabiko Udalak bat egin du UEMA Udalerri Euskaldunen Mankomunitateak abian jarri duen “Egin nirekin ere euskaraz” kanpainarekin. Ekimenaren helburua da herritarren hizkuntza-jarreretan eragitea eta bereziki pertsona arrazializatuekin euskararen erabileran sortzen diren inertziak azaleratzea.

Askotan gertatzen da, itxura edo aurreiritzien eraginez, herritar batzuei automatikoki gaztelaniaz zuzentzea, nahiz eta euskaraz ulertzeko edo hitz egiteko gai izan. UEMAren arabera, praktika horiek ez dute soilik komunikazioa baldintzatzen, baizik eta euskarara gerturatzen ari diren pertsonen ahalegina ikusezin bihurtu ere egiten dute.

Kanpainak azpimarratu nahi du jatorri atzerritarreko herritar askok euskara ikasteko pausoa eman dutela azken urteetan, eta horri balioa eman behar zaiola eguneroko harremanetan ere. Euskaraz egitea, kasu askotan, harrera eta aitortza modua ere badela gogorarazi nahi du ekimenak.

Mallabiko Udalak kanpainarekin bat eginez, herritarren artean mezua zabaltzeko eta hizkuntza-ohitura inklusiboagoak sustatzeko konpromisoa berretsi du.