Amorebieta-Etxanoko Inauteriak: kolorea, musika eta tradizioa kalez kale
MUGA DURANGALDEKO AISIALDI GIDA
Inauterien etorrerarekin batera, Amorebieta-Etxanoko Udalak adin guztietarako pentsatutako egitarau oparoa prestatu du, askotariko jarduerak uztartuz: haurrentzako tailerrak eta ikuskizunak, mozorro lehiaketak, kalejirak eta festa giroa herriko txoko guztietan.
Ene Kantak.
Ohi bezala, Perubelek emango die hasiera ospakizunei otsailaren 13an, arratsaldeko 19:00etan. Zelaieta parkeko kioskotik abiatuko den kalejirak, Udazken gaitero taldearen doinuekin, Zubiondo parkera eramango du inauterietako lehen giroa. Otsailaren 13tik 17ra bitartean, Amorebieta-Etxanoko kaleak kolorez eta alaitasunez beteko dira, tradizioa eta berrikuntza eskutik helduta.
Ekintza ugari, gustu eta adin guztientzat
Inauterien hasiera egunean, otsailaren 13an, ostiralean, 17:00etan eskulan tailerra egingo da ludotekan, eta 18:00etan Gaztedi Berri Fanfarria taldeak festa girotuko du Abasolo Apezpiku kalean. 19:00etan, Perubelen aurkezpenarekin, kalejira abiatuko da Zelaietatik Zubiondora. Ondoren, 19:30ean, txorizo eta sagardo dastaketa izango da Zubiondo plazako karpan, DJ Xaiborrekin, gaua musikaz luzatzeko.
Larunbatean, otsailaren 14an, 12:30ean Udabarri Dantza Taldeak inauterietako dantza tradizionalak eskainiko ditu kaleetan. Arratsaldean, 17:00etan, photocalla jarriko da Zubiondo plazako karpan, eta aldi berean eskulan tailerra egingo da ludotekan. 18:00etan, Zirkozaurren “Harreman” umeentzako ikuskizuna izango da Zelaieta parkean. Eguna amaitzeko, 19:00etan, Triki Piu Band taldearen kalejirak herriko hainbat plaza eta kale zeharkatuko ditu.
Astelehenean, otsailaren 16an, 11:30ean, Nafarroa Zentroan inauterietako pintxo lehiaketa egingo da, ogi txigortua osagai nagusi gisa hartuta.
Inauteriei amaiera emateko, otsailaren 17an, asteartean, 11:30ean Euskal Mitologia Desfilea eta Lehiaketa ospatuko dira Nafarroa Zentroan, erabiltzaile eta profesionalen parte-hartzearekin. Arratsaldean, 17:00etan, Polaroid photocalla eta Instagram bidezko mozorro lehiaketa egingo dira ludotekan, eta eskulan tailerrak gaztetxokoan. 18:00etan, Ene Kantak taldeak “Dantzan” ikuskizuna eskainiko du Zubiondo plazako karpan. Azken kalejira 19:00etan abiatuko da Zubiondotik Zelaietara, Perubelen agurrarekin eta Udazken gaitero eta Zinbulu Dantza Bertikala taldeekin.
Amorebieta-Etxanoko Udalak herritarrak inauteriez gozatzera gonbidatzen ditu, kaleak biziz, kolorez eta parte-hartzez betez, eta egitarauan jasotako ekintzetan parte hartzera animatuz.
