‘Jokoan’ jaialdia bueltan da azaroan, Amorebieta IV frontoian

Azaroaren 23an eta 24an, Zelaieta Zentroko IV. frontoian, Jokoan mahai-jokoen jaialdia ospatuko da. Adin guztientzako jarduera dibertigarriak izango dira, familian edo lagun artean ondo pasatzeko eta, mahai jokoen bitartez, zornotzarrei aisialdi eskaintza desberdina eskaintzeko helburuz.

Ekitaldia bi egunetan zehar ospatuko da eta bi txanda izango ditu egunero. Goizez 11:30etik 14:00etara izango da, eta arratsaldez 16:30etik 20:00etara.

Hiru espazio desberdin eta mahai-jolas ugari aukeran

Ekitaldian hiru gune desberdin egongo dira, mahai-joko aukera zabalarekin:  Gune orokorra, familia gunea eta merkataritza gunea.

• Gune orokorra: 9 urtetik gorakoentzat eta helduentzat pentsatua dago, eta bertan 20 joko mahai egongo dira erabilgarri. Jokoen artean, halaber, Aventureros al tren, Love letter, Mariposas, Ten, The island, Potion explotion edota River dragons izango dira aukeran, besteak beste. Sarrera librea izango da, betiere mahaiak libre badaude. Gainera, jokoak ulertzeko laguntza behar izanez gero, pertsona bat prest egongo da bertan dinamika azaltzeko.
• Familia-gunea: 4 urtetik gorakoentzako espazioa izango da. Bertan 24 mahai-joko egongo dira eta parte hartzeko ezinbestekoa izango da aurrez erreserba egitea. Jokoan parte hartzeko talde bakoitzean heldu bat egotea derrigorrezkoa izango da. Monitoreek jokoak aukeratzen lagunduko dute eta beharrezkoa izanez gero, arauak azalduko dizkiete parte-hartzaileei. Aukeran egongo dira, besteak beste, Dobble, Escondite fantasma, Bihurrikeriak, Abejitas zum zum, Serpentinas, Pelusas edota Ouch bezalako jolasak.
• Merkataritza-gunea: beste batzuetan egin den moduan, merkataritza gunea ere izango da, kasu honetan, Joker dendaren eskutik. Bertan, mahai-joko berriak probatu eta erosteko aukera egongo da. Aurten, gainera, Joker dendaren 30. urteurrena ospatuko da, eta erosketak egiten dituztenentzat hainbat sorpresa egongo dira.

Informazio gehiago lortzeko edo erreserbak egiteko, deitu 94 630 06 49 telefonora edota kontsultatu www.jokoan.com webgunea.