Zabaldu da Euskararen Nazioarteko Eguneko irakurraldian parte hartzeko izen ematea Amorebieta-Etxanon

Amorebieta-Etxanoko Udalak, Euskararen Nazioarteko Eguna ospatzeko, abenduaren 3an irakurraldi berezi bat antolatu du. Aurten, Iñaki Irasizabal idazle zornotzarraren «Otsoa etorriko da» liburua irakurriko da, Zelaietako Auditoriumean, arratsaldeko 17:00etatik 20:00etara.

Iñaki Irasizabal idazle zornotzarra.

Irasizabalen Otsoa etorriko da iaz kaleratutako nobela da, eta 28 urteko emakume gazte bat du protagonista. Eleberriak thriller kutsua du, eta idazleak hainbat nobela gehiago ere argitaratu ditu genero honetan, hala nola, Burua txoriz beterik, Mendaroko txokolatea, Igelak benetan hiltzen dira, eta Odolaren deia.

Ekimena aurrera eramateko 85 lagunen parte-hartzea behar da, horrenbestez, irakurketan parte hartu nahi dutenek azaroaren 24a baino lehen izena eman beharko dute euskara@amorebieta.eus helbidera idatziz.

Ekimen hau euskararen aldeko konpromisoa berresteko eta euskal literatura herritarren artean sustatzeko antolatu da. Hala, Amorebieta-Etxanoko Udalak herritar oro gonbidatzen du irakurraldian parte hartzera eta euskararen aldeko ekimen honetaz gozatzera.