Arrakasta handiko hasiera izan du ‘Neu ere liburuzain’ ekimenak Elorrion

Aste honetan jarri dute martxan Elorrioko Udal Liburutegian Neu ere liburuzain ekimena. Arrakastatsua izan zen iazko estreinaldia eta arrakastatsua izaten ari da oraingoa. Datozen asteetan, guztira hogei neska-mutilek parte hartu ahal izango dute, bikoteka. Ia plaza guztiak bete dira, beraz, interesa dutenak azkar ibili beharko dira liburutegian eskura dagoen esku-orria betetzeko.

​Euskadi Irratiko Faktoria irratsaioraino heldu da egitasmoaren oihartzuna. Iaz esperientzia probatu zuten bi lagun elkarrizketatu dituzte: Maindi Zabala Egidazu eta Uxue Maria Gorostola. Aipatu dute sarritan joaten direla liburutegira eta atentzioa ematen zietela liburuzainaren lanak. Horregatik, haiek ere tarte batez liburuzain izan zitezkeela ikusi zutenean, ez zuten zalantzarik izan.

​Ainhoa Larrinaga liburuzainari ere eman diote ahotsa irratsaioan. Ekimena martxan jartzearen arrazoia gaztetxo askok interesa erakutsi izana dela adierazi du: “Laguntzera etortzen zitzaizkigunez, begiratu genuen ea beste liburutegi batzuetan bazegoen halako ekimenen bat martxan. Bilbon eta Gasteizen, adibidez, egin ohi dute. Beraz, zergatik ez Elorrion? Liburutegi txikia izan arren, badugu aukera halako dinamika politak aurrera ateratzeko”.

​Hala, partaideak ikastetxeetatik irteten direnean joaten dira liburutegira eta ordu eta erdi inguru aritzen dira bertaratzen diren horiei maileguak edo itzulketak egiten, liburu berriei zigilua jartzen edota itzultzen diren liburuak dagokien apaletan kokatzen, Gainera, DBH ikasten ari diren askok ere erakutsi dute liburuzain izateko interesa; hori dela eta, Larrinagak ez du baztertzen urte berriarekin haiei begirako jarduera prestatzea.

​Entzun erreportajea ​ hemen sakatuta.