Bueltan da ‘Bertokoan Berton’, Euba, San Miguel, Etxano eta Boroa auzoak dinamizatzeko jarduerekin

Amorebieta-Etxanoko Udalak “Bertokoak Berton” ekimenaren programazio berria aurkeztu du gaur, udalerriko landa-auzoak dinamizatzeko eta horiek jarduera kulturala eta soziala integratzeko iaz sortutako ekimena. Euba, San Miguel, Etxano eta Boroa auzoetan urte hasieran abian jarritako esperientzia pilotuaren arrakastaren ondoren, Udalak jardueren egutegi berri bat aurkeztu du orain, aipatu lau auzoetarako. 

Amorebieta-Etxanoko alkateak, Ainhoa Salterainek, eta kultura zinegotziak, Koldo Bilbaok, Euba, San Migel, Etxano eta Boroako auzokideekin batera, egitarau berriak jasotzen dituen jardueren berri eman du gaur. Hala, aurtengo programak, urritik urtarrilera bitarte egingo diren hainbat ekintza batzen ditu, ohiko moduan, kultur, kirol zein gizarte arlokoak: pintxo tailerrak, defentsa pertsonal ikastaroa, larruzko zorroak zein terrario bat egiten ikasteko tailerrak, txalaparta…

Ekintza bereziak: kontzertua, antzerkia eta bingo-festa

Berrikuntza gisa, aurtengoan, lau ekintza berezi ere antolatu ditu Udalak: Iñaki Basabe eta Bilbao Bel Cantoren kontzertuak San Migelen, Bingofesta Boroan eta Eraitsi SL antzerkia Etxanon. Ekintza horiek, aipatu auzoetan soilik egingo dira, hau da, ez dira, gainerako ekintzen moduan, auzoz-auzo errepikatuko, horregatik dute, hain zuzen, izaera berezia. Ekitaldiak, noski, irekiak izango dira eta beste auzoetako bizilagunak parte-hartzera gonbidatuta daude.

Landa auzoak integratzea eta dinamizatzea helburu

Bertokoak Berton Arkalaz ekimenaren baitan sortu zen eta helburu du udalerriko eremu guztiak integratu eta kohesionatzea, eremu bakar bat ere baztertuta gera ez dadin.

Hala, “Bertokoak Berton” programa sortzeko Euba, San Migel, Etxano eta Boroako bizilagunekin bilerak egin eta haien proposamenak jaso zituen aurrez Udalak eta bigarren edizio honetako jarduerak ere auzotarren ekarpen horiek aintzat hartuta osatu du Udalak, betiere auzotarren interesei erantzungo dieten programazioa sortzea helburu izanik.

Bertokoan-Berton bigarren edizioko egitaraua

Esan bezala, auzo bakoitzak bere egitaraua du, ekintza bereziak barne. Ekintza horiek dira:

• Pintxo tailerra: Bermeoko kontserbekin 3 pintxo osasungarri egiten ikasteko tailerra izango da.
• Larruzko zorroak egiteko tailerra: patroi batetik abiatuta larruzko zorroak egiten ikasiko dute parte-hartzaileek, kolore eta egitura ezberdinekin. Larruazala lantzeko, jostek, itsasteko edota margotzeko teknika desberdinak ere ikasiko dituzte.
• Terrarioa sortzeko tailerra: Terrarioa, beirazko ontzi baten barruan dagoen lorategi txiki bat da. Parte-hartzaileek terrarioa sortzen ikasiko dute, zein landare erabili daitezkeen eta berau sortzeko ezinbestekoak diren elementuak (ikatza, goroldioa, harriak…) ezagutuz.
• Defentsa pertsonala: Defentsa pertsonaleko teknikak ezagutzeko ikastaroa izango da, egoera deserosoen aurrean nola jokatu ikasteko. Erasoren bat jasoz gero dagoen araudia ere landuko da. Ikastaroa teorioa izango da, praktikaldi txikiekin.
• Kalabaza haimaika eratan: Kalabaza oinarri hartuta 4 kontserba mota sukaldatuko dira, gozotik gazira.
• Txalaparta tailerra: Euskal musika tresna tradizional zahar eta misteriotsu honen teknika erakutsiko da.

Ekintza bereziak

• Iñaki Basaberen kontzertua (San Migelen): azaroaren 30ean euskal kantautorearen kontzertua jasoko du San Migel auzoak. Bere musikak euskal musika tradizionala ñabardura modernoekin uztartzen ditu, sentimenduz beteriko konposizioak sortuz.
• Bingofesta (Boroan): urtarrilaren 25ean egingo da Boroan eta musika eta ohiko bingoa uztartzen dituen ekitaldia izango da.
• Eraitsi SL antzerkia (Etxanon): Espazio publikoa eta jolasaren inguruan hausnartzen duen adin guztientzako kaleko ikuskizuna.
• Bilbao Bel Canto kontzertua (San Migelen): opera eta zarzuela musika estiloak uztartzen dituen kontzertua, abenduaren 29an.

Auzo bakoitzeko egitaraua

• Boroa: Pintxo tailerra (urriak 16), Larruzko zorroak (azaroak 6), terrarioa egiteko tailerra (azaroak 20), defentsa pertsonala (abenduak 11), kalabaza hamaika eratan (urtarrilak 15)  eta Bingofesta (urtarrilak 25).
• Etxano: Pintxo tailerra (urriak 17), larruzko zorroak (azaroak 7), terrarioa egiteko tailerra (azaroak 21), Eraitsi SL antzerkia (azaroak 23). defentsa pertsonala (abenduak 12), kalabaza hamaika eratan (urtarrila 16) eta txalaparta (urtarrilak 30).
• San Migel: pintxo tailerra (urriak 23), larruzko zorroak (azaroak 13), Iñaki Basaberen kontzertua (azaroak 30), terrarioa egiten ikasteko tailerra (abenduak 11) eta kalabaza hamaika eratan (urtarrilak 22).
• Euba: Pintxo tailerra (urriak 24), larruzko zorroak (azaroak 14), defentsa pertsonala (azaroak 28), terrarioa egiten ikasteko tailerra (abenduak 12) eta txalaparta (urtarrilak 23).