Larunbat honetan, errogatibak Urkiolatik Zelaietara eramango du jai giroa

Datorren larunbatean, abuztuak 31, Urkiolarako Errogatiba ospatuko da, Abadiñon tradizio handia duen eguna. Aurten, ordea, aldaketa nabarmena izango du errogatibak, boluntario falta dela eta.

Argazkia · Abadiñoko Udala

Aurreko urteetan bezala, eguna goizeko 9:00etan hasiko da, Muntsaratzeko Andra Mari ermitan egingo den hitzorduarekin. Tradizioz, une horretan San Rokeren irudia Urkiolako santutegira eramaten zen, baina aurten, boluntario falta dela eta, irudia baselizan geratuko da. Hala ere, martxa ohi bezala egingo da, Txakurzuloko ohiko geldialdia eta ohiko hamarretakoa barne. Erabaki zaila baina beharrezkoa izan da Abadiñon jaiegun honen jarraipena ziurtatzeko.

Errogatibarekin bat eginez, Gizarte Ongizate sailak beste urte batez herri bazkaria antolatu du herriko erretiratuentzat. Autobusa 10:20an aterako da Muntsaratzetik, Zelaietan eta Traña-Matienan geldialdiak eginez. 11:30ean meza izango da Urkiolako santutegian, eta ondoren dantzariak eta txistulariak.

Garrantzitsua da azpimarratzea, mezaren ostean eta dantzari eta txistularien emanaldian zehar, ez dela ohiko ardo botilen banaketarik egingo bazkarirako. Udalak aho batez onartutako ordenantza berriari jarraiki dator erabaki hori; ordenantza horren arabera, ez da diru publikorik erabiliko horrelako ekitaldietan alkohola emateko. Horren ordez, produktu ekologikoak eskainiko dira, eta, hala, kontsumo lokala eta iraunkorra sustatuko da.

14:00etan erretiratuentzako herri bazkaria izango da, eta udal zinegotziak ere bertan izango dira. Bazkalostean, ohiko txitxarriloaz gozatzeko aukera izango dute bertaratzen direnek. Itzultzeko autobusa 18:00etan abiatuko da Urkiolatik.

Festa giroa iluntzean

Horrez gain, aurten ere gisatu herrikoia egingo dute, Txanportako plazan, 20:00etan. Eguraldi txarra eginez gero, probalekura eramango da ekitaldia. Lotxo Taldea erromeriak girotuko du gaualdia. Tiketak euro bat balio izan du, eta bildutako dirua Elikagaien Bankuari emango zaio.

 “Gizarte Ongizate eta Kultura sailetatik, tradizio honen garrantzia nabarmendu nahi dugu, eta gure esker ona adierazi nahi diegu berau gauzatzen laguntzen duten pertsona guztiei. Espero dugu etorkizunean udalerriko pertsona gehiago animatzea boluntario gisa parte hartzera, errogatibaren nortasuna bizirik eutsi ahal izateko”, esan du Edurne Maguregi alkateorde eta Gizarte Ongizateko zinegotziak.