Martxan da Larreako bigarren hiruhilekoko ikastaroetan izena emateko epea
Amorebieta-Etxanoko Udalak iragarri du gaurtik aurrera, otsailaren 26a, zabalik dela Larrea kiroldegiak 2024ko bigarren hiruhilekoan eskainiko diren ikastaroetan izena emateko epea. Interesatuek martxoaren 6ra arte izango dute aukera, bai Larrea kiroldegiko harreran, bai Udalaren webguneko «Izen emateak» atalean.
Eskabideak dauden plazak baino gehiago badira, zozketa egingo da martxoaren 8an, plazak esleitu ahal izateko. Eskatzaileek gehienez hiru ikastaro aukeratu ahal izango dituzte, interesaren arabera lehentasuna emanda. Zozketaren emaitzak zuzenean jakinaraziko zaizkie interesdunei posta elektronikoz; kiroldegiko harreran ere kontsultatu ahal izango dituzte martxoaren 11n.
Esleipendunek martxoaren 15a baino lehen berretsi beharko dute plaza, posta elektronikoz jasotako jarraibideei jarraituz edo dagokion dokumentua sinatuz Larrea kiroldegiko harreran. Epe barruan baieztatzen ez bada, esleitutako plaza galdu egingo da.
Itxaron-zerrenda eta postu hutsen esleipena
Plaza hutsak itxaron-zerrendan izena emanda daudenei esleituko zaizkie, eta martxoaren 18an jakinaraziko zaizkie. Martxoaren 19ra arte izango dute euren plaza baieztatzeko aukera. Hori horrela, martxoaren 21ean irekiko da oraindik libre dauden plazetarako izen-ematea, bai Udalaren webgunean, bai Larrea kiroldegian.
Izen-ematea berresten bada, ikastaroaren zenbatekoa ordaintzeko konpromisoa hartzen da. Bajak ontzat emango dira justifikatutako, ustekabeko eta ezohiko arrazoiengatik direnean, eta baja eskariak Udalean erregistratu beharko dira, dagokion dokumentazioarekin. Adingabeen edo tutoretzapeko pertsonen kasuan, haien legezko ordezkariek kudeatu beharko dute baja-eskaria.
Haurren igeriketa ikastaroa
Plazarik lortu ez eta itxarote-zerrendan geratzen diren haurrei plaza bat bermatuko zaie hurrengo ikasturterako maila eta ordutegi bereko ikastaro batean, beti ere horretarako aukerarik bada. Hala ere, ezinbestekoa izango da berriz ere hurrengo ikasturtean izena ematea, ezarritako epeen barruan.
