Idoia Otaduy Berrizko zinegotzia izango da Durangaldeko Mankomunitateko presidentea datozen lau urteetan

Atzo arratsaldean Astolako Etxean (Abadiño) elkartu zen Durangaldeko Mankomunitatearen osoko bilkurak, Idoia Otaduy Berrizko Udaleko zinegotzia (EH Bildu) aukeratu zuen erakundeko presidente hurrengo lau urteetarako. Ainara Otxotorena Mañariko alkateak (EH Bildu) hartuko zuen erakundearen presidenteordetza.

Mireia Elkoroiribe eta Idoia Otaduy.

Idoia Otaduyk 48 urte ditu eta joan den ekainean estreinatu zen zinegotzi gisa; Eroski kooperatibako marketin departamentuko zuzendaritza laguntzailea da. Makila Mireia Elkoroiribe (EAJ) presidente ohiaren eta gaur egungo Durangoko alkatearen eskutik jaso ondoren, Otaduyk eskerrak eman dizkio osoko bilkurari berarengan jarritako konfiantzarengatik.

Konpromisoa

“Orain arte gauzatutako proiektuak aztertzeko, zerbitzuak hobetzeko eta udalekin harremanak estutzeko konpromisoa hartzen dut. Ahalegin berezia egingo dugu gizarte-zerbitzuetan premia gehien dituzten pertsonen bizi-kalitatea hobetzen saiatzeko”, azpimarratu du Idoia Otaduyk Durangaldeko Mankomunitateko presidente moduan egin duen lehen hitzaldian.