Asteartea,
2024ko Apirilak16

MugaKultura

loader-image
Durango
10:49 pm,
temperature icon 11°C
Humidity 97 %
Ráfagas de viento: 28 Km/h

Ximon Agirre hernaniarraren mundu fantastikoa, 58. Durangoko Azokaren kartelean

Fantasia DA!  Abenduaren 6tik 10era, Durangoko Azoka fantasiaz beteko da. Dagoeneko 58 urte igaro dira hasierako bultzatzaileen ametsetik. Fantasia hura errealitate bihurtu zen, eta gaur egun euskal kulturaren egutegian ezinbesteko hitzordua da. 

Nerea Mujika Gerediaga elkarteko presidenteak antolatzaileen nahia azaldu du. “Euskal kulturari bultzada emateko asmoz, Durangoko Azoka jendetsu eta aberatsa izatea, horixe da gure fantasia”. Hain zuzen, lema horixe izango da: Fantasia DA!. Ideiaren atzean dagoen unibertsoaz hitz egin du Mujikak. “Fantasia da sortzaile berrien ilusioa, liburuen usaina, diskoen kolorea, kulturzaleen irribarrea, bolondresen lana, aspaldi ikusi gabeko lagunekin topatzea, sormen bakoitzaren istorioan dagoen magia, jende alaiaren berbaroa, bizigogoa, kulturaren beroa”.

Egitaraurako proposamenak

Egitarauari dagokionez, Beñat Gaztelurrutia Gerediagako koordinatzaileak gogoratu du oraindik zabalik dagoela proposamenak egiteko aukera, urriaren 15era arte, webgune honetan bertan. Aurtengo edizioan, Ikasle Goiza azokaren bigarren egunean izango da, abenduaren 7an. Ikastetxeetako eta aisialdi taldeetako gazteei zuzendutako egitaraua egongo da.

Aurrez aurreko azokaren aldeko apustua

Bestalde, 2020an online azoka ipini zen martxan, pandemiak eragindako egoerak behartuta. 2021ean, aurrez aurrekoa eta birtuala elkartu ziren, erdibideko azoka batean. Iaz, onlineko aukera mantendu arren, azoka presentziala indartu zen, eta erabiltzaileek ere aukera hori lehenetsi zuten. “Hori dela eta, aurten aurrez aurreko azokaren aldeko apustu osoa egingo dugu. Online ereduaren leihoa itxiko dugu. Hala ere, pertsiana guztiz bota barik; izan ere, etorkizunean horren premia egonez gero, egoerara egokitzeko adi egongo gara”, esplikatu du Gaztelurrutiak.

Zu non, han DA!

Azokaren osteko astean, Zu non, han DA! ekimenaren bitartez, Euskal Herri osorako zabalkundeari jarraipena emango zaio. Ekimen honi esker, Durangoko Azokako nobedadeak eskuragarri egongo dira Euskal Herriko hainbat liburu dendatan. Hauetako zenbaitetan, gainera, liburu aurkezpen bereziak antolatuko dira. Liburu saltokientzat izen-ematea asteon zabaldu da.

Erakundeen eta babesleen ordezkariak, antolatzaileekin batera

Aurkezpenean izan dira Gerediaga elkarteko Nerea Mujika (presidentea) eta Beñat Gaztelurrutia (koordinatzailea) eta guneetako arduradunak: Miren Narbaiza (Ahotsenea), Irati Agorria (Irudienea), Martxel Zubia (Saguganbara), Arantza Arrazola (Szenatokia) eta Oihane Agirre (Azoka Telebista). Erakunde kolaboratzaile zein babesleen ordezkariak ere bai: Mireia Elkoroiribe Durangoko alkatea, Isaac Amezaga Bizkaiko Euskara zuzendari nagusia, Andoni Iturbe Eusko Jaurlaritzako Kultura sailburuordea, Mari Jose Telleria Gipuzkoako Kultura zuzendari nagusia, Jone Berriozabal Arabako Euskara diputatua, Jabier Arakama Nafarroako Euskarabideako zuzendaria, Koldo Bilbao (BBK), Josean Yela (Eroski), Eider Rodriguez (Euskaltel), eta Iñaki Nubla (Konfekoop).

Ximon Agirreren mundu fantastikoa

58. Durangoko Azokaren irudia Ximon Agirre artistak egin du. Aurkezpenean adierazi du “Ilusio handiz” hartu zuela aurtengo kartela diseinatzeko proposamena, Durangoko Azoka “kulturaren erakusleiho handi bat” izateagatik, eta baita bertan aurkeztu izan diren zenbait diskoren diseinuak ere egin izan dituelako.

Nerea Mujika eta Ximon Agirre.

Kartel honetakoa hiru dimentsioko irudi sakona da, errealitate birtualean landua. “Hasieratik argi nuen 3Dn egin nahi nuela, gero mundu horren barruan sartu ahal izateko, eta errealitate birtualaren bidez modelatu nahi nuen, askatasun gehiago edukitzeko”, esplikatu du Agirrek. Kolore alai eta saturatuekin, Durangoko Azokaren festa izaera bistaratzeko helburua izan du. “Kartelaren ideia nagusia mundu propio bat sortzea izan da, azokaren elementuak (liburuak, musika, bideogintza, teknologia berriak…) pertsonaia fantastikoekin uztartuz”.

Ximon Agirre (Hernani, 1994) Artean graduatu zen Euskal Herriko Unibertsitatean eta Inprimaketa Grafikoko, Ilustrazioko eta Lanketa Artistikoko Masterra egin zuen Gaztela-Mantxako Unibertsitatean. Ilustrazioan, bideogintzan eta animazioan jardundakoa da. Azken urteotan musika taldeentzat -Belako, Lukiek, Toc, Kyxo, Kristonak, Amooma eta Kilimak, besteak beste- egin du lan gehienbat, diskoen azalak, kontzertuetarako kartelak eta bideoklipak sortzen.

Ayúdanos a crecer en cultura difundiendo esta idea.

Bilatu