Udalak 229.100 euro gehiago inbertitu beharko ditu Andra Mariako portikoan aurkitutako patologia berriak konpontzeko

Durangoko Udalak kreditu aldaketa baten proposamena eramango du uztailaren 19ko Osoko Bilkurara, Andra Mariako elizpea birmoldatzeko obretan 216.495 euro gehiago inbertitzeko. Erabaki hori Obra Zuzendaritzak duela hilabete batzuk hasieran kontratatutako proiektuan jaso gabeko patologia berriak antzeman ondoren hartu da.

Argazkia · Unai Urigoitia

Zurezko egitura birmoldatzeko lanak aurtengo udaberrian hasi ziren, zenbait patologia konpontzeko inbertsio handi batekin. Orain, Obra Zuzendaritzak ohartarazi ondoren, proiektua aldatuko da, eta, ondoren, obra kontratua aldatuko da.

Aldaketa horrek ustekabeko gainkostua ekarriko dio egungo gobernu taldeari, 229.132,67 eurokoa (BEZa barne), eta obraren iraupen epea hiru hilabete luzatuko da.

Hasierako aurrekontua 620.824€koa zen, eta horietatik 200.000€ Eusko Jaurlaritzaren dirulaguntza ziren. Hau da, kostu osoa (229.132.67 €) 849.956,67 €-koa da.

Elizpearen eraikuntza 1676. urtean agindu zuen Durangoko Udalak. Armadura Martin de Gabiria arotzak diseinatu zuen, eta harrizko zutabeak, berriz, Domingo de Barraicua harginaren diseinuaren bidez egin ziren. 1681. urterako erabat amaituta egon zen.

Elizpearen funtzionaltasuna izugarria izan da, bai iraganean eta baita gaur egun. Durango osoko espaziorik erabilienetako, ibilienetakoa eta funtzionalenetakoa da. Nabarmentzekoa da plaza publiko estalia eta irekia dela, urtean 365 egunez eta egunean 24 orduz.