Astelehenean hasiko dira Durangoko Muruetatorre eraikin historikoa eta Madalena plaza birgaitzeko lanak

Durangoko Udalak astelehenean hasiko ditu Muruetatorre dorretxea eta Madalena plaza birgaitzeko lanak. Muruetatorre eraikin historikoa, anbulatorioaren eta Landako eskolaren ondoan dagoena eta 1.660 urte ingurukoa, balio sinboliko handiko eraikina da, gaur egun erabiltzen ez dena. Obra hauekin barrualdea prestatuko da herritarren eskura jartzeko, eta bilera-gune eta erabilera anitzeko gune bihurtuko da. Lanek 651.804,62 euroko aurrekontua izango dute (BEZa barne) eta gauzatzeko epea zazpi hilabete ingurukoa izango da. Goitu eraikuntzak SL enpresak garatuko ditu lanak.

Muruetatorre.

Halaber, egun berean, uztailaren 10ean, Madalena plaza birgaitzeko obrak hasiko ditu Udalak. Horren bidez, udalerriko gune sinbolikoetako bat den plazaren irisgarritasuna eta itxura hobetu nahi dira. Horretarako, Durangoko Udalak 442.041,98 euro bideratuko ditu proiektura, BEZa barne.

Gainera, Madalena plazako ermitako teilatu hegalak konpontzeko eta txukuntzeko lanak egiten ari da egunotan Udala, hezetasunak hondatuta baitzeuden. Obra horiek plazaren obrekin hasi aurretik egin nahi izan dira. Horrela, ez dute eraginik izango uztailean ospatzen diren auzoko jaiei begira.

Muruetatorre

Muruetatorre dorretxea balio sinboliko handiko eraikin historikoa da, hainbat hamarkadatan erabili gabe egon dena. Orain, eraberritze lanekin, barrualdea prestatuko da herritarren eskura jartzeko, eta bilera gune eta erabilera balioaniztun bihurtuko da.

Eraikina 1.100 metro karratuko lursail hesitu batean dago, eta berau ere herritarrentzako zabalduko da. Eraikinak berak 400m2-ko azalera eraikia du, eta gaur egun eraikinaren barrualdea egokitu gabe dago, igogailuaren zutabea eta metalezko eskailerak baino ez daudelarik.

Erreforma proiektuak, gainera, energia kontsumoa jaisteko planteamendua dauka. Lan horiei esker, energia primario ez berriztagarriaren kontsumoan eta CO2 isurketetan %93 aurreztea lortuko da.

Lan horiek finantzatzen laguntzeko, Durangoko Udalak 211.748 euroko dirulaguntza jaso du ‘Next Generation’ funts europarren eskutik. Obrek zortzi hilabeteko gehieneko epea dute gauzatzeko.

Madalena

Era berean, Madalena plaza birgaitzeko lanak plazaren kanpoko aldeak prestatuz hasiko dira, hala nola bainu publikoaren kokapen berria, jaien ospakizunari ez eragiteko. Horrela, plazaren lurzoruari zuzenean eragiten dioten lanak uztailaren 24an hasiko dira.

Lan hauek ermita hartu nahi dute ardatz nagusi gisa, absidea erreferentziatzat hartuta, eta hortik espazioa antolatuko duen biribil bat zabalduko da. Horrela, ermitaren atzealdeari balioa emango zaio, eta handik ingurura begira dagoen harmaila bat sortuko da. Sare zirkular horren bidez, irisgarritasuna ere konponduko da, eta gaur egun dauden desnibel guztiak integratuko dira.

Plazaren ikuspegi osoa bermatzeko, ikusmen hesiak kendu edo lekuz aldatuko dira, hala nola, komun publikoak eta autobus markesina eta autobusaren etxola; horrela, hiribidearen eta plazaren arteko igarobidea erraztuko da.

Lanek dauden perimetro horma, parterre eta loreontzi guztiak kenduko dituzte, eta zoladura motak murriztuko dituzte. Hori guztia, ermitaren inguruko pertsonen fluxua hobetzeko, ermitak plazan duen protagonismoa indartuko baitu.