Durangok azterketa arkeologikoak egingo ditu Tabiran eta Mikeldiko ermitaren inguruko zorupean zer dagoen jakiteko
Durangoko Udalak, hainbat unibertsitatetako doktore arkeologo eta geologoekin elkarlanean, azterketa arkeologiko bat egingo du datozen asteetan, uriaren historia ezagutzeko bi gune estrategikotan.
Lan horiek, alde batetik, Tabira auzoan gaur egun Durango izenez ezagutzen den herriaren jatorriaren aztarna arkeologikoak bilatzean oinarrituko dira. Bestalde, San Bizente baselizaren inguruan Mikeldiko Idoloarekin batera eraikuntzarik edo egokitzapenik egin ote den aztertuko da.
Ikerketa taldea Luis Valdés doktore eta Historiako Errege Akademiako kideak zuzenduko du, eta Aranzadi Elkarteko Antxoka Martinez doktorearen eta Madrilgo Universidad Complutenseko geologo eta CA.I.ko teknikari Javier Vallesen laguntza izango du. 3D teknikari batez gain, lantalde horretan hainbat profesionalek parte hartuko dute, beharren arabera.
Ikerketa aurkezteko, Luis Valdés ikerketaren zuzendariak prentsaurrekoa eskaini du Durangoko Udaleko ordezkariekin batera, eta lan horien garrantzia azpimarratu du, Tabira eta Mikeldi ermiten inguruetako zorupean zer dagoen jakiteko eta, horrela, egungo Durangoko historia ezagutu eta interpretatu ahal izateko.
Ikerketen hipotesia
Ikerketa hasteko erabili zen hipotesiaren arabera, garai hartako hainbat dokumenturen bidez ezaguna da Durangoko Konde edo Jaunaren kargua edota Durangoko Konderria, historian zehar erresuma desberdinak zerbitzatu ziena.
Gertakari horiei dagokienez, egiantz-itxura duen dokumentu zaharrena Gonzalo de Otalora y Guissassa jaunak 1634an egindako Durangoko Merinaldearen deskripzioa da, Durangoko Merinaldearen Mikrologiam agertzen dena. Paragrafo horretan deskribatzen denez, eraikina San Pedro elizaren parean zegoen, eta Jaunen jauregia eta bizilekua zen. Gune horrek Tavira zuen izena.
ARGAZKIA · Garikoitz Estornés Zubizarreta
Mikeldiko San Bizente baseliza zaharra
Bestalde, Mikeldiko San Bizente baseliza zaharraren inguruan, Madalenaren eta errekaren artean, oso informazio gutxi dago. 1991n indusketa arkeologikoak egin ziren, baina ez zen emaitza aipagarririk jaso. Nolanahi ere, Bilborako Erdi Aroko errepidea eta ingurunea ez ziren ikertu Mikeldiren testuinguruaren inguruan aztarna posibleen bila. Gaur egun eraiki gabe dagoen eremuak aukera paregabea eman dezake kostaldetik goi-lautadarako bidearen eta eraikin ezezagunen aztarnak aztertzeko.
Stream X georradarra
“Gure herriaren historia ezagutu nahi dugu, eta ikerketa honetarako esperientzia eta ezagutza handiko profesionalak ditugu. Gure iraganari buruzko zalantzak eta ziurtasunak berretsi edo argitu nahi ditugu, etorkizunera begira geure burua hobeto ezagutzeko; beraz, ikerketa honek norabide horretan lagundu ahal izatea espero dugu” adierazi dute, Ima Garrastatxu alkateak eta Julian Rios alkateordeak.
Ikerketa prospekzio georradarraren teknikaren bidez egingo da. Horri esker zorupearen egitura ikertu ahal izango da, bulkada elektromagnetikoak transmitituz eta ondoren lurpean dauden etenek sortutako informazioa jasoz. Horretarako, Madrilgo Complutense Unibertsitateko Arkeometria Ikerketarako Laguntza Zentroak Stream X georradarra jarriko du eskuragarri, geofisikan aditua den Javier Valles Iriso geologoak zuzenduko duena.
Landa lana bi egunekoa izango da, baina, lanak egiteko, ingurumen baldintza egokiek euririk ez egitea aurreikusi behar dute, bai aurreko egunetan, bai landa egunetan. Arduradunek lanak martxoaren amaieran egitea aurreikusten dute.
