Durangoko Udalak milioi bat euro inbertituko ditu Bartolome Ertzilla Kontserbatorioa eta Musika Eskola birgaitzeko

Durangoko Udalak 1.003.206 euro inbertituko ditu Bartolome Ertzilla musika eskolako teilatua birgaitzeko eta hainbat hobekuntza egiteko. Horrela, Durangoko Udalak duela urte batzuetatik eraikinak dituen gabeziei aurre egin eta konpondu nahi ditu, itoginak kasu. Horretarako, Udalak proiektua idatzita dauka dagoeneko eta Bulego Teknikoa pleguak prestatzen ari da, ondoren lizitatzeko.

Lanek zortzi hilabeteko iraupena izango dute eta urtearen amaieran hasiko dira. Udal arduradunak zein irakaslegoa elkarlanean ari dira zerbitzua lekualdatu eta ikasleek beren ikasketak garatzen jarraitu ahal dezaten.

Horri dagokionez, Ima Garrastatxu alkateak eta Jorge Varela zinegotziak azpimarratu dute dagoeneko lanean ari direla Eusko Jaurlaritzako Hezkuntza Sailarekin batera datorren urteko ikasturteak birkokatzeko: “Legegintzaldi honetan ahalegin handia egiten ari gara urte askoan ahaztutako udal eraikinak berreskuratzeko, eta musika eskola beste adibideetako bat da”.

Bartolome Ertzilla musika eskola eta kontserbatorioa eskola zaharren eraikinean dago. 1926ko eraikina da, 1983. urtean egindako eraberritzearen ondoren musika eskola gisa ireki zena.

Fondoak

Azken urteetan etengabe izan diren itoginen eta estaldura materialaren egoeraren ondorioz, teilatua konpontzeko proiektua 2020. urtearen hasieran hasi zen planteatzen, eta pandemian zehar aldi baterako geldituta geratu zen. 2021ean, teilak erabat ordezkatzeko eta iragazgaiztea eta eraginkortasun energetikoa hobetzeko proiektua idazteko eskatu zuen Udalak. Proiektua idazterakoan ikusi zen egitura ez zegoela egoera onean, eta, beraz, osorik aztertu zen. Horren ondorioz, estalki osoa ordeztea proposatu da, egurrezko egitura barne.

Durangoko Udalak ‘Next Generation’ Europako funtsetara aurkeztu du proiektua, eta dirulaguntzaren ebazpenaren zain dago. “Gure gazteen eta haien hezkuntzaren aldeko apustua da, kasu honetan hezkuntza musikalaren aldekoa. Horregatik, Udaletik lan hauekiko dugun konpromisoa berresten dugu, gure musika eskola eta kontserbatorio hobekuntzak ekarriko baitituzte”.