Durangoko Errotari Mikologia Elkartearen liburuxkako etekin guztiak JAEDentzako izango dira

Urtero bezala, Errotari Elkarteak Durangoko mikologiaren inguruko katalogoa kaleratu berri du. Hala ere, aurten edizio berezia izango da, izan ere, katalogoa Dendak Bai-ko komertzioetan salduko da, eta bertatik lortutako diru guztia JAED elkarteari eskainiko zaio. Katalogo horren finantziazioa Durangoko Udalak hartu du bere gain.

Aurtengo berritasun guztiak aurkeztu asmoz, lau eragileetako ordezkariek prentsaurrekoa eskaini dute astelehen honetan udaletxean. Bertan, Juanan Bueno zinegotziak “eragile eta elkarteen arteko lankidetza” nabarmendu nahi izan du: “Durangok elkarte sare oso baliotsua dauka, eta euren artean lankidetzan ikusteak gure herriarekiko harro sentiarazten gaitu”.

Mikologia urtekari berri honek herrian zehar aurkitu diren 50 perretxiko ezberdinen informazioa dakar. Perretxiko bakoitzaren fitxan, herriko zein puntu zehatzetan aurkitu den ezagutarazteaz gain, horren ezaugarriak azaltzen dira.

Liburuxkak dagoeneko salgai daude Dendak Bai Merkataritza eta Ostalaritzako negozio batzuetan, 10 euroren truke. Salmenta horretatik jasotzen den diru guztia JAED elkartearentzako joango da aurten. Zentzu horretan, Estibaliz Zurikarai JAED-ko presidenteak eskerrak eman nahi izan dizkie ekimen hau aurrera ateratzea posible egin duten guztiei.