Umeentzako yoga eta mindfulness Amorebietako ludotekaren online programazio berrian

Amorebieta-Etxanoko Udaleko Kultura Sailak bere online programazioa berritu du, ekainerako ume eta gazteen aisialdirako proposamen berriak bilduz. Proposamenak web orrian daude ikusgai: htpp://ametxgazteria.eus.

Programazio berriak familian egiteko mindfulness saioak biltzen ditu, sei guztira, eta gaur hasiko dira. Bideoetan (bideo guztiak euskaraz dira), irakaslearekin batera pailazo bat egongo da, eta honek lasaitasuna lantzeko proposatuko diren jolas eta ariketak modu hurbilago, dinamiko eta ludikoago batean azaltzen lagunduko dio.

Hilabete honetako proposamenak umeentzako eta gazteentzako yoga ere biltzen du. Zehazki, saio bi egongo dira nerabe eta gazteentzat ekainaren 11n eta 25ean, eta 3 eta 7 urte arteko umeentzako saio bat ekainaren 18an.

Halaber, online eskainiko diren zerbitzuen artean sexu orientazioa egongo da, webgunean eskura egongo diren hainbat bideorekin.

Umeentzako denbora-pasak

Gainera, hilabete osoan zehar, ludotekak umeentzako denbora-pasak eta jolasak eskaintzen jarraituko du, Aitor Ormaetxeak ipuinak kontatzen jarraituko du (hiru saio egongo dira), eta Sorgina Txirulinaren ipuin bat ere egongo da.

Gaueroetxeanen programazioak nerabeentzako eskaintzari eutsiko dio, eta larunbat guztietan grafiti eta magia tailerrak egongo dira online.

Programatutako jarduera guztien bideoak hilabete osoan zehar ikusi ahal izango dira online.