Kasko historikoko hainbat guneetako lurra garbitu du Elorrioko Udalak

· Lanak Udaleko Garbiketa Taldeak burutu ditu, eta, besteak beste, Musiko Arriola kaleko arkua garbitu da

Urteetan garbitu gabe zeuden hainbat kale zein kantoi garbitu ditu Elorrioko Udalak azken asteetan. Besteak beste, Berrio Otxoa kaleko hainbat kantoi, Iturri Kultur Etxetik Errebonbilo kalera artekoa, basilikaren atzeko partea, Erreka kale zein Kanpokale eta plaza ingurua garbitzen ari dira. Horretaz gain, Musiko Arriola kaleko arkua material berezi batekin garbitzen ari dira.

Lan horiek Udaleko Garbiketa Taldeak burutu ditu, eta talde horrek egindako lana balioan jarri nahi izan dute udal ordezkariek: “Udal gobernutik merezi duen balioa eman nahi diogu Garbiketa Taldeari, hamarkadetan egin ez den lana egiten baitabiltza. Apustu garbia egiten dugu beraien lanaren alde”.

Zentzu horretan, herri garbiketa egiteko hainbat gailu berri erosi ditu udalak, Garbiketa Taldeari erreminta berriak eskainiz. Hurrengo pausoa plazako zoruan ez labaintzeko tratamendua ematea izango da.