DURANGO · Ekintza bereziak Domekäeron

Durangoko Udalak Domekäero Durangoko haur eta gazteentzako aisialdi programaren barruan ekainean egingo diren ekintza bereziak ezagutzera eman ditu, besteak beste, disko festa bat eta antzerki kontzertu bat. Bi ekintzak Plateruena Kafe Antzokian egingo dira, ekainaren 23 eta 24an hurrenez hurren. Bi kasuetan sarrera librea izango da leku-kopurua bete arte (500 pertsona).

Alde batetik, San Juan gaua aprobetxatuz, ekainaren 23an Durangoko Udalak disko-festa bat antolatu du DJ Txurruren eskutik. Musika emanaldia 20:00etan hasiko da eta ondoren, jada ohikoa den San Juanada ospatuko da udalerrian.

Beste alde batetik, txotxongiloekin egindako “Kontu kantari 2 Mendian ibiltari” antzerki kontzertua igandean, ekainak 24 ospatuko da eta familiei zuzenduta egongo da. 50 minututan zehar, parte hartaileek erritmo ezberdinetara eramango diren betiko euskal kantaz gozatzeko aukera izango dute. Beste batzuen artean, honakoak entzun ahal izango dira: Haurtxo polita, Axuri beltza, Aldapeko, Ikusi mendizaleak, Loretxo bat, Baratze bat, Kolpe kolpeka, Guk euskaraz, Furra furra eta Arratsalde honetan.