Hilean bi larunbatez igerilekuak haur parke bihurtuko ditu Durangoko Udalak

Igerilekuetan umeentzako puzgarriak eta jolaserako materiala jarriko ditu Durangoko Udalak hilean bi larunbatez; horrela, igerilekuek umeentzako ur-parke itxura hartuko dute. Ekainean eta uztailean egingo dira lehen saioak, eta irailean ekingo zaio berriro ekimenari. Hasteko, denboraldi honetan lau zapatutan egongo dira puzgarriak igerilekuetan: ekainaren 2an eta 16an, arratsaldez (16:30etik 20:30era); eta uztailaren 14an eta 28an, goizez (09:30etik 13:30era).

ARGAZKIA · Durango Kirolak

Durango Kirolakeko presidente Pilar Riosen berbetan, “ideia honekin umeentzako aisialdi eskaintza handitu gura dugu, eta, bide batez, igerilekuak familiek gozatzeko leku bihurtu elkarrekin egoteko denbora duten egunetan”.

Riosek azaldu duenez, sarrera mugatua izango da. “25-30 minuturo 20 pertsonari utziko zaie sartzen. Horrela, gehienez eguneko 120 adingabe eta senideri emango diegu zerbitzua. Ekainean eta uztailean saiakera egin eta gero, irailean berriro hasiko dugu jarduera, egutegi eta ordutegi berriekin”.

Zerbitzua 4 eta 11 urte arteko umeentzat izango da, eta haurrek igerian jakin beharko dute. “Ahal den eta segurtasun handiena bermatu nahi dugu, eta adintxikikoak helduekin sartu beharko dira; ume bakoitzeko heldu bat joan beharko da”, zehaztu du Riosek.

· Oztopo-pista · 25-30 minutuko tarte horietan familiek uretako pista txiki batez eta oztopo-pista batez gozatu ahalko dute Nata2 igerilekuan (25 metroko luzeera eta 1,45 metroko sakonera). Horrez gain, jolaserako beste elementu batzuk izango dituzte beste igerileku baten: txurroak, pilotak, jostailuak, etab. Jostailu horiekin ibiltzeko helduen zaintza eta laguntza izango dute umeek.

Instalazioak erabiltzeko erreserba egin beharko da, eta internet bidez edo harrerako makinetan eman ahalko da izena puzgarrien egunaren bezperara arte. Egunean bertan ere eman ahalko da izena, baldin eta plazak libre badaude.

Kiroldegiko bazkideak zein bazkide ez direnak sartu ahalko dira igerilekuetara larunbat berezi horietan. Dena dela, Durango Kirolakeko datu basean fitxarik ez dutenek erreserba egunean bertan baino ezin izango dute egin.