Gaur goizean, Unai Rementeria Bizkaiko Ahaldun Nagusiak  harrera egin die Ibilaldia 2016ko arduradunei, besteak beste, Durangoko Kurutziaga eta Ibaizabal ikastoletako ordezkariei; izan ere, haiek dira igandean ospatuko den Ibilaldiaren 38. edizioaren antolatzaileak. Bisitaldian zehar, Bizkaiko ikastolen aurtengo jaiaren arduradunek gonbidapena egin diote Rementeriari, maiatzaren 29an ospakizunarekin bat egin dezan eta Ahaldun Nagusiak baietza eman die.

«Dagigun!» lelopean, Durangok Bilboren testigua hartuko du; iaz, milaka pertsona bildu ziren hiriburuan, euskal kulturaren eta euskararen alde. Antolatzaileek jarduera ugari antolatu dituzte ibilbidearen bost eremuetan, igandean Durangora hurbiltzen diren milaka euskaltzaleentzat.

· Kurutziaga eta Ibaizabal · Ibilaldiaren 38. edizioaren helburua funtsak biltzea da, Kurutziaga ikastolak Haur Hezkuntzako eraikina eraberritu dezan eta Ibaizabal ikastolak batxilerreko eraikin berriak sortu dion zorra ordaintzeko aukera izan dezan.

Aurten ere, Bizkaiko Foru Aldundia Bizkaiko ikastolen jaian izango da, Lurraldean euskara berreskuratzeko eta bizitzako arlo guztietan normalizatu eta erabiltzeko hartua duen konpromisoa erakusteko.