GUKATIK HIKARA · Hikan berba egiteko topalekua eratu dute Durangon

Izaskun Ellakuriaga

Izan duzu inoiz hikan egiteko gogorik?  Guka Durangoko euskaltzaleen bilguneak abian ipiniko duen topalekuan aukera izango da. Lehenengo hitzordua asteon ipini dute: maiatzak 5, osteguna, arratsaldeko 7:30ean, Plateruena antzokian.

Dei zabala egin dute: hikan berba egitea berreskuratu nahi dutenei, hikan berba egiten ikasi nahi dutenei, hikan berba egiteko lagunartea aurkitu nahi dutenei. Informazio gehiago behar duenak posta elektroniko bat ere badu eskura: euskarazguka@gmail.com