Dantz Point Durangok musika elektronikoa eramango du Tabira parkera ostiralean

Durangok ‘Dantz Point Durango’ ekimenaren edizio berri bat hartuko du ostiral honetan, irailaren 4an. Tabira Parkea musika elektroniko garaikidearen agertoki bihurtuko da 18:00etatik gauerdira arte; hala, udalerriko berdegune eta topagune nagusietako bat musikaren, dantzaren eta kulturaren elkargune bilakatuko da.

Hardrose.

Aire zabaleko egitasmo honek abangoardiako doinuak eta Durangoko hiri zein natura-ingurunea uztartzea du helburu, herritarrei musika elektronikoaz aire librean gozatzeko aukera eskainiz.

Aurten, Hardrose, Suupe eta Dispersion artistek osatuko dute kartela, eta haiek izango dira arratsaldeko zein gaueko musika-programazioko protagonistak. Sarrera doakoa izango da, eta herritar orori irekia egongo da.

Durangoko Udalak Tabira Parkera gerturatzeko eta esperientzia honetaz gozatzeko deia egin die herritarrei.