362 kuadrilla, 5.900 bazkaltiar eta 23 laguntza-langile Amorebietako marmitako lehiaketan

Amorebieta-Etxano prest dago zapatuan Marmitako Lehiaketarako. Aurtengo hitzorduan 5.900 lagunek hartuko dute parte, 362 kuadrillatan banatuta, eta Udalak antolakuntza indartzeko 23 pertsona kontratatu ditu enplegu-poltsaren bidez.

Iazko irabazleak. IBAN GORRITI (MUGA)

Kontratatutako langileetatik 21ek lehiaketa egunean mahaiak, aulkiak eta gainerako materiala banatzeko lanak egingo dituzte. Beste bi pertsonak, berriz, jai guztietan zehar mugikortasun murriztua duten pertsonentzako erreserbatutako espazioen erabilera egokia zaindu eta bermatuko dute eszenatokietan.

Bestalde, lehiaketako guneak zozketa publiko bidez esleitu dira dagoeneko. Guztira, 5.900 parte-hartzaileak biltzen dituzten 362 kuadrillek dagoeneko ezagutzen dute zein izango den euren kokapena, eta emaitzak udalaren webgunean kontsulta daitezke.

Marmitako Lehiaketa Amorebieta-Etxanoko jaietako hitzordu nagusietako bat da, eta urtez urte parte-hartzaile gehiago erakartzen ditu. Horregatik, iaz gehitutako guneak mantenduko dira aurten ere Ogenbarrena auzoan eta San Pedro zein Lehendakari Agirre kaleetan. Espazioen banaketa orokorra, ordea, ez da aldatu.

Halaber, iaz bezala, komunen garbiketa etengabe egingo da jardunaldi osoan, parte-hartzaileei zerbitzu egokia bermatzeko.

Mahaiak eta aulkiak 10:30etik 13:00etara banatuko dira esleitutako guneetan, eta 13:00etatik 19:30era jasoko dira. Antolatzaileek gogorarazi dute kuadrillek antolakuntzaren jarraibideak bete beharko dituztela une oro. Sari banaketa 14:30etik 15:00etara izango da, Zubiondo plazan.