Amorebieta-Etxanok erritmo elektronikoen topagune bihurtuko da zapatuan

Datorren maiatzaren 2ko zapatuan, Amorebieta-Etxanok musika elektronikoaren doinuez beteko du giroa, Infinity Clubbing kultur kolektiboak antolatutako ekimenari esker. Hitzordua Zelaietako Kontzertu Gelan izango da, arratsaldeko 18:00etatik aurrera, eta 18 urtetik gorako gazteei zuzenduta egongo da. Gainera, sarrera doakoa izango da.

Ekitaldiak kalitate handiko musika elektronikoa eskainiko du, nazioarteko zein bertako artisten eskutik. Nabarmentzekoa da Kolonbiatik etorriko diren gonbidatu berezien presentzia: Matheo Velez, Jose M, Gabo Forero eta Mao Montenegro. Haiekin batera, tokiko eszenako ordezkariak ere arituko dira, besteak beste Kolditto (Durango) eta Nebreda (Mungia), tech-house estiloko saioekin.

Hasierako giroa berotzeko ardura, berriz, etxeko artistek hartuko dute: Maikdark eta Asiertech zornotzarrek irekiko dute ekitaldia, bertako publikoaren aurrean.

Ekimen honen bidez, Amorebieta-Etxanok gazteei zuzendutako aisialdi eskaintza indartzen jarraitzen du, egungo musika eta kultura sustatuz. Udalak herritarrak animatzen ditu ekitaldira bertaratu eta giroaz gozatzera.