3 HITZALDI DURANGALDEAN · Liztor asiarrari aurre egiteko herritarren inplikazioa giltzarri
Urkiola Landa Garapen Elkarteak eta Erlete Elkarteak liztor asiarraren (Vespa velutina) aurkako hitzaldi informatibo eta formatiboak antolatu dituzte Durangaldean, herritarrak espezie inbaditzaile hori identifikatzen eta kontrolatzen laguntzeko. Ekimenak eskualdeko hainbat udalen eta Bizkaiko Foru Aldundiaren babesa du.
Egoi Escudero, Idoia Madariaga eta Erramun Osa. URKIOLA LANDA GARAPENA
Hiru hitzaldi Durangaldeko hiru herrietan
Jardunaldien barruan, hiru hitzaldi egingo dira eskualdeko hiru udalerritan, guztiak 18:00etan eta herritar guztiei irekita. Lehen hitzaldia martxoaren 10ean izango da, asteartez, Iurretan. Bertan Iñaki Narbaiza izango da hizlaria, eta saioa Ibarretxe Kultur Etxean egingo da.
Bigarren hitzaldia martxoaren 11n izango da, asteazkenez, Durangon. Kasu honetan, Aitor Unzueta arituko da hizlari, eta jardunaldia udaletxeko pleno aretoan egingo da.
Azkenik, hirugarren hitzaldia martxoaren 12an izango da, ostegunez, Elorrion. Felix Zabarte izango da hizlaria, eta saioa Iturri Kultur Etxean egingo da.
Saioetan liztor asiarraren portaera, identifikazioa eta kontrolerako estrategiak azalduko dituzte, bereziki udaberrian erreginak harrapatzearen garrantzia azpimarratuz.
Ekimenaren aurkezpena Berrizen
Ekimen hau atzo aurkeztu zuten Berrizen, Urkiola Landa Garapenaren egoitzan. Aurkezpenean Erramun Osa, Egoi Escudero eta Idoia Madariaga aritu ziren hizlari.
Bertan azaldu zutenez, ezinezkoa da liztor asiarraren espezie inbaditzailea guztiz desagerraraztea, baina elkarlanean aurrerapausoak eman daitezke.
«Ez da posible espezie honekin guztiz amaitzea, baina denon artean pixkanaka terrenoa irabazten joan gaitezke», adierazi zuen Erramun Osak.
100 boluntariotik gorako sarea
Antolatzaileek nabarmendu dutenez, dagoeneko 100 boluntariotik gorako sare bat ari da lanean eskualdean, udalekin, ikastetxeekin eta beste eragile batzuekin elkarlanean.
Boluntarioek tranpak jartzen eta jarraipena egiten dute, liztor asiarraren hedapena kontrolatzeko. Osaren arabera, edozein herritarrek parte har dezake ekimen sozialean.
«Parte hartu nahi duenak bat egin dezake ekimen sozial honekin», gaineratu zuen.
Biodibertsitaterako mehatxua
Liztor asiarra mehatxu handia da biodibertsitaterako eta erlezaintzarako, izan ere, erlezainen arabera, eskualdeko zenbait tokitan ezti ekoizpena %70era arte murrizten ari da espezie honen ondorioz.
Horregatik, jardunaldien helburua da herritarrak kontzientziatzea eta trebatzea, espezie inbaditzaile honen aurrean eskualde osoan erantzun koordinatua emateko.
Aurkezpena. IBAN GORRITI (MUGA)
Ikastetxeen parte-hartzea
Egoi Escuderok azaldu zuenez, dagoeneko ehun boluntariotik gora ari dira ekimenean parte hartzen, eta horrez gain, beste hainbat ikastetxe ere proiektura batu dira. Haren esanetan, helburu nagusia arazo honen inguruko kontzientzia soziala handitzea da.
«Oso garrantzitsua da egiten ari garen lanari ikusgarritasuna ematea; izan ere, ez gara gai espezie honekin amaitzeko, baina urratsez urrats aurrera egin dezakegu. Horregatik antolatu ditugu, besteak beste, hiru hitzaldi hauek», azaldu zuen.
Bere aldetik, Idoia Madariagak azaldu zuen irakaslea dela eta Eibarko bere ikastetxean ere tranpak jartzeko ekimena martxan jarri dutela, emaitza oso positiboekin. Haren arabera, liztor asiarraren presentziak kezka sortzen du sarritan eskoletan, batez ere habiak agertzen direnean edo, noizean behin, liztorrak geletara sartzen direnean.
Halaber, eskerrak eman zizkion Urkiola Landa Garapenari, ikastetxe askok aurrekonturik ez dutenez halako neurriak hartzeko, erakundeak bere gain hartu duelako materialaren eta ekimenaren kostua.
Azkenik, Erramun Osak azpimarratu zuen egiten ari den lana «komunitate-lana» dela, eta herritarrak —pertsonak zein familiak— boluntario gisa proiektura bat egitera animatu zituen.
«Zenbat eta jende gehiago batu, orduan eta onura handiagoa izango dugu guztiok», ondorioztatu zuen.
