Harkaitz Canoren testuekin sortutako antzezlan bat Arriolan, ostiralean

MUGA DURANGALDEKO GIDA

Datorren otsailaren 13an, ostirala, 20:00etan, “Nor naizen baneki” antzezlana eskainiko da, euskaraz, antzokian. Artedrama eta Axut! konpainien proposamen eszeniko berria da, eta Ximun Fuchsek zuzendu du, Harkaitz Cano eta Ximun Fuchsen testuetan oinarrituta.

120 minutuko iraupena duen lanak zazpi aktore izango ditu oholtza gainean: Ramon Agirre, Garoa Bugallo, Maialen Diaz, Aline Etxeberri, Manex Fuchs, Idoia Tapia eta Oier Zuñiga. Antzezlanaren sarrerak 15 euro balioko du; bazkideek 10 euro ordainduko dute, eta gazte bazkideek zein Arriolakideek 7,50 euro.

“Nor naizen baneki” lanak antzerkia barne-indusketarako tresna gisa planteatzen du, eta antzoki baten indusketa arkeologiko baten bidez garatzen da. Historiaren geruzak lurpetik ateratzen dira, aurkitutako objektuen eta denboran zehar agertzen diren pertsonaien bidez. Euskaraz sortu, kontatu eta antzeztutako piezak identitatearen bilaketa du ardatz, Irulegiko eskuaren aurkikuntza abiapuntu hartuta.

Antzezlanak erromatarren garaitik gaur egunera arteko ibilbidea egiten du, bi mila urtetan metatutako gertaerak eta trauma historikoak azaleratuz. Besteak beste, Inkisizioa, Frantziako Iraultza, Karlistadak eta 1936ko gerra agertzen dira, familia, jabetza, mugak, herentzia genetikoa eta indarkeria koloniala bezalako gaiak jorratzeko.

Azterketa historikoarekin batera, pertsonaiek barne-bilaketa ere egiten dute, erabaki garrantzitsuen eta beren kontraesanen artean. Eszenaratzea agertoki biluzi batean gauzatzen da, eta laser-teknologia zein bideo-proiekzioak erabiltzen dira espazioa eraikitzeko eta narrazioa laguntzeko.