Bi enpresa aurkeztu dira Izurtzako Udaletxe aurreko plaza berritzeko lehiaketa publikora

MUGA AISIALDIA

Bi enpresaren proposamenak jaso ditu Izurtzako Udalak Udaletxe aurreko plaza eraberritzeko irekitako lehiaketa publikoan. Udalak izapide administratiboekin jarraitzen du orain, lanak esleitu ahal izateko eta proiektua martxan jartzeko hurrengo urratsak emateko.

IZURTZAKO UDALA.

Plaza berritzeko egitasmoak azken hilabeteetan aurrerapen esanguratsuak izan ditu. Udalbatzak proiektua onartu zuen udaberrian, aho batez, eta ondoren lizitaziorako baldintzak zehaztu ziren. Horren ondorioz, lehiaketa publikoak bi enpresaren interesa piztu du. Lanek 608.302 euroko aurrekontua dute eta zortzi hilabeteko gauzatze-epea aurreikusten da.

Proiektuak beharrezko baimen gehienak eskuratuta ditu jada, tartean URA agentziarena, eta beste erakunde baten azken onespenaren zain dago. Egutegiak aurreikuspenak betez gero, lanen esleipena uda amaieran egitea da asmoa, eta obrak herriko jaien ostean hastea, urri aldera.

Plaza gaur egungo erabileretara moldatzeko diseinua da proposamenaren ardatz nagusietako bat. Horretarako, herritarrekin egindako hainbat bilkuren bidez jasotako ekarpenak kontuan hartu dira. Helburua espazio irekia eta moldakorra izatea da, ekitaldi desberdinak hartzeko gai izango dena. Eremu nagusi lauan, umeentzako ur-jokoak jarriko dira, zoruaren mailan integratuta.

ESTALITAKO GUNE BERRI BAT

Bestalde, estalitako gune berri bat eraikiko da, eserleku eta inguruko berdeguneekin, atseden hartzeko eta elkargune gisa baliatzeko. Haurrentzako jolas-eremua ere lekuz aldatuko da, tabernaren ingurura hurbilduz, estalki batekin eta jolas-elementu berriekin. Estalkiek diseinu bateratua izango dute, frontoiaren antzeko estetika erabiliz.

Azkenik, plazarako ibilgailuen sarbidea berrantolatuko da, eta oinezkoentzako sarrerak hobetu egingo dira irisgarritasuna errazteko. Horrela, Izurtzako plazak itxura berritua ez ezik, erabilgarritasun handiagoa ere izango du etorkizunean.