‘Go!azen’ fenomenoa Zornotza Aretoan bi emanaldi izango ditu otsailaren 14an

MUGA DURANGALDEKO AISIALDI GIDA

ETB1eko Go!azen telesaileko aurpegi ezagunenek, haur eta gazteen artean fenomeno bilakatu den ekoizpeneko protagonistek, Go!azen 12 ikuskizun musikala aurkeztuko dute Amorebieta-Etxanoko Zornotza Aretoan. Emanaldia otsailaren 14an, larunbata, izango da, bi saioetan: 17:00etan eta 19:00etan, eta 5 urtetik gorako publikoari zuzenduta dago.

Pausoka ekoiztetxeak sortutako ikuskizunak 70 minutuko iraupena du eta Basakabi udaleku ospetsuan girotutako istorio berri bat eramaten du eszenatokira. Aurten, Maitanek ideia berritzaile bat jarri du martxan: Basakabi “bigarren aukeren” udaleku bihurtzea. Hala ere, Garazik ez daki ezer plan horien inguruan, eta horrek egoera gatazkatsuak sortuko ditu.

Arazoak dituzten gaztez beteko da udalekuaren egunerokoa, eta egoera are gehiago korapilatuko da Kuxkuxero izeneko pertsonaia misteriotsuak ikasleen inguruko informazioa sare sozialetan zabaltzen hasten denean. Maitasuna, anai-arrebak arteko gorrotoa, mendekua eta abesti berri ugari uztartzen dira istorio honetan.

Ikuskizuna Itziar Gomezek zuzendu du, gidoia Xabi Zabaletarena da eta zuzendaritza musikala Jokin Pinachok sinatzen du. Antzezleen artean daude, besteak beste, Garazi Urkola, Irati Marin, Adriana Sanchez, Ander Ayerza eta Nerea Elizalde, gazteen artean oso ezagunak diren aurpegiak.

Sarreren prezioa 5,45 eurokoa da saio bakoitzerako, eta urtarrilaren 14tik aurrera egongo dira eskuragarri. Informazio gehiago nahi izanez gero, interesdunek kultura@amorebieta.eus helbidera jo dezakete.

Oharra: ikuskizunean argi kliskatzaileak edo efektu estroboskopikoak erabiltzen dira zenbait eszenatan, ikusle fotosentikorrei eragin diezaieketenak.