EZIN DUZU GALDU · ‘Zorretan’ antzerki saritua larunbat honetan Durangoko San Agustinen

MUGA ANTZERKIA

Durangok kalitate goreneko antzerkia izango du larunbat honetan, urtarrilaren 17an, San Agustin Kultur Gunean. Hika Teatroak taularatuko duen “Zorretan” lanak geldialdia egingo du herrian, arratsaldeko 19:00etan, eta hitzordu berezia izango da euskal antzerkizaleentzat.

Miren Gaztañaga.

Euskarazko tragikomedia honek Donostia Antzerki Saria 2025 jaso du, eta, horrez gain, sei izendapen lortu ditu Max sarietan, egungo euskal eszenaren indarra eta maila berretsiz. Taula gainean, aurpegi oso ezagunak: Miren Gaztañaga, Iñake Irastorza eta Jabi Barandiaran, Agurtzane Intxaurragaren zuzendaritzapean, Miren Gojenolaren laguntzarekin.

“Zorretan” zaintzez, maitasunaz eta elkarbizitzaz mintzo den tragikomedia absurdo eta poetikoa da. Lore eta Jon bikotearen istorioa kontatzen du, euren egunerokoa erabat iraultzen den unean: Jonek Loreren ama etxean bizitzera gonbidatzen duenean. Une horretatik aurrera, egoera barregarri eta surrealistak kateatzen dira, etxebizitza ez ezik, pertsonaien bizitzak ere nahasteraino. Narrazioa iraganaren, orainaren eta etorkizunaren artean mugitzen da, emozioz eta irudiz betetako kontakizun hautsi batean.

EZINBESTEKOA

80 minutuko iraupena duen lan honek ikuslea barruraino eramaten du, umorea eta samurtasuna uztartuz, eta antzerkia maite dutenentzat ezinbesteko proposamena da. Sarrerak 10 eurotan daude eskuragarri, eta 7,50 eurotan bazkideentzat.

Kalitate handiko antzerkia, sariak, izen handiak eta euskarazko sorkuntza uztartzen dituen emanaldi honek merezi du Durangoko publikoaren babesa. Aukera paregabea da larunbat arratsaldean San Agustin Kultur Gunea betetzeko eta antzerkia lehen lerroan bizitzeko