Eñaut Elorrieta eta Alos Quarteten arteko zuzeneko proiektua 23an Zornotza Aretoan

MUGA AMOREBIETA-ETXANO

Urtarrilaren 23an, ostirala, 20:00etan, Zornotza Aretoak musika emanaldi berezi bat hartuko du: Ahots kordak, Eñaut Elorrieta eta Alos Quarteten arteko zuzeneko proiektua. Ahotsa eta sokak oinarri dituen proposamen intimo eta zaindua izango da, ikus-entzuleei esperientzia musikal bakarra eskaintzeko asmoz.

Bi artistek elkarrekin hainbat lanetan kolaboratu izan duten arren, hau izango da lehen aldia zuzeneko proiektu oso bat elkarrekin aurkezten dutena. 70 minutuko iraupena izango duen kontzertuak Eñaut Elorrietaren ibilbide osoa hartuko du ardatz, Ken Zazpi garaiko kantuetatik hasi eta bere bakarkako azken lanetaraino. Horrez gain, Alos Quarteten hainbat pieza esanguratsu ere eskainiko dira, moldaketa berezi eta dotoreekin.

Emanaldian soka laukotea, ahotsa eta gitarra uztartuko dira, goi mailako moldaketekin eta giro intimo batean. Kontzertua publiko guztientzat egokia da, eta sarreren prezioa 12,70 eurokoa da.

Kredituak
Ahotsa: Eñaut Elorrieta
Musikariak: Xabier Zeberio, Lorena Nuñez, Francisco Herrero eta Alejandro Saúl
Eszenografia eta argi diseinua: Javier Ulla