Jon Batiz zornotzarrak Afrikako begirada pertsonala ekarri du Zelaietara erakusketa eta hitzaldi baten bidez

MUGA ARGAZKIGINTZA

Erakusketa eta hitzaldi batek Afrikako paisaia, fauna eta bizipen pertsonaletara hurbiltzeko aukera eskainiko dute datozen egunetan Amorebieta-Etxanon. Zelaieta kultur etxeko erakusketa-aretoak, urtarrilaren 30era arte, «Afrikako oroitzapenak: sabanaren begiak» erakusketa hartuko du, Jon Batiz artista zornotzarraren argazki-lanen bilduma. Bi Afrikako bidaiatan egindako lanaren emaitza da —horietako bat Amets zortzi urteko semearekin batera egina—, baita egileak boluntario gisa bizitako esperientzien isla ere. Bildumak Afrikako fauna basatiaren irudiak biltzen ditu, begirada hurbil eta pertsonaletik hartuak.

Erakusketaren osagarri gisa, urtarrilaren 21ean, asteazkena, 19:15ean, Zelaietako auditorioan «11 istorio eta film labur bat» izeneko hitzaldia eskainiko du Batizek. Saio horretan, egileak bere bidaien alderdirik intimoena eta ezezagunena partekatuko du publikoarekin. Hamaika argazkiren bidez, irudi bakoitzaren atzean dauden istorioak azalduko ditu, une ustekabeak, bitxikeriak eta bizipen pertsonalak barne. Jardunaldia Iberiar penintsulako sugegorriak ardatz dituen film labur baten proiekzioarekin amaituko da.

Argazkilaritzazaleei, naturaren maitaleei eta munduko hainbat txokotako errealitate natural eta humanoa begirada zuzen eta zintzo batetik ezagutu nahi dutenei zuzenduta daude bai erakusketa bai hitzaldia. Jon Batizen lanak irudiaz harago doan kontakizuna eskaintzen du, esperientzia eta emozioa uztartuz.