Amorebietako Nafarroa Zentroak laugarren urtez jaso du Bizkaiko Foru Aldundiaren sari bat
MUGA AMOREBIETA-ETXANO
Laugarren urtez jarraian, Bizkaiko Foru Aldundiak Amorebieta-Etxanoko Nafarroa Zentroa saritu du, iraupen luzeko zaintza arloan egindako lan berritzaileagatik. Oraingoan, Priscilla: Reinas de Nafarroa proiektuagatik jaso du saria; obra hori Priscilla, reina del desierto musikalaren egokitzapena da eta Nafarroa zentroko adineko pertsonak, desgaitasuna duten pertsonak eta zentroko profesionalak izan zituen protagonista.
Obra ekainean estreinatu zen, eta praktika eredugarritzat jo da, zaintzan inplikatutako pertsona guztien artean — erabiltzaileak, familiak, hurbileko pertsonak eta profesionalak — harreman egokiak sortzeko izan duen gaitasun eta balioagatik, duintasuna, eskubideak eta tratu ona erdigunean jartzen dituen eredu baten baitan kokatuta. Proiektua duen ikuspegi komunitarioagatik nabarmentzen da, baita egunerokotasunean bizitza publikotik kanpo geratzen direnentzat adierazpen eta parte-hartze espazio berriak irekitzeagatik ere.
Elkartzen, hunkitzen eta eraldatzen duen musikala
Hasieratik, Priscilla: Reinas del Nafarroa musikal bat baino askoz gehiago izan da. Hilabeteetan zehar, erabiltzaileek eta profesionalek elkarrekin lan egin zuten aniztasuna, maitatzeko askatasuna eta gizarteratzea gailentzen dituen ikuskizun honi forma emateko. Musika, dantza eta antzerkia tresna egokiak izan ziren partaide izatearen zentzua indartzeko, sormena sustatzeko eta parte-hartzaileen ongizate emozionala hobetzeko.
Estreinaldia arrakastatsua izan zen eta zornotzar ugari bildu zituen, baita Udaleko, Eusko Jaurlaritzako eta Bizkaiko Foru Aldundiko ordezkariak ere. Gainera, udalerriko ikastetxeek ere parte hartu zuten ekitaldiaren kartel ofiziala diseinatzen, ekimenaren izaera irekia eta belaunaldiartekotasuna indartuz.
Komunitatearekiko konpromisoa eta tratu ona
Bizkaiko Foru Aldundiaren errekonozimendu honek Nafarroa Zentroak pertsonengan oinarritutako arreta-eredu batekin duen konpromisoa indartzen du beste behin, errespetuan, entzutean eta komunitate osoaren inplikazio aktiboan oinarritua.
