Zigor Iturrieta Berrizen, belaunaldien arteko sukaldaritza ekimen berriaren gidari

MUGA AISIALDIA

20 urtetik gorako pertsonei zuzendutako ekimena Zigor Iturrieta sukaldariak emango du, eta herritarren parte-hartzea eta belaunaldien arteko bizikidetza sustatzea du helburu.

Berrizko Udalak udalerrian parte hartzea sustatzen duten ekimenak bultzatzen jarraitzen du. Oraingo honetan, sukaldaritza ikastaro pilotu bat jarri da martxan, azaroan eta abenduan, Nagusien Etxean, Zigor Iturrieta sukaldariaren eskutik.

Proiektua bi helbururekin sortu da: alde batetik, zentroaren jarduera dinamizatzea, belaunaldien arteko topagune ireki gisa erabiltzea sustatuz, eta, bestetik, Berrizko herritarrei sukaldaritzaren inguruko esperientzia praktiko eta eskuragarria eskaintzea.

Lehen edizio honek proposamenaren harrera ezagutzeko eta, emaitzen arabera, datorren urtean zehar jarduera gastronomiko berriak planteatzeko balioko du. Jarduera horien artean, oinarrizko sukaldaritza-tailerrak, sukaldaritza osasungarrikoak edo sukaldaritza landukoak egon litezke, maila eta helburu desberdinetara egokituta.

Azaroko ikastaroak bi orduko bi saio izango ditu, euskaraz eta gaztelaniaz, oinarrizko eta hurbileko ikuspegiarekin, hilaren 18an eta 20an, 17:30etik 19:30era. Jarduera 20 urtetik gorako pertsonei zuzenduta dago. Tailer bakoitzeko plazak 12 pertsonara mugatuta egongo dira, eta aldez aurretik jasotako izen-emateen artean zozketa bidez erabakiko da parte-hartzea; gainera, talde batean hautatutako pertsonek ezin izango dute errepikatu hurrengoetan, ahalik eta parte-hartze zabalena ahalbidetzeko. Edizio honetan, lau euskal saltsa tradizionalen ikaskuntza barneratuko da.

Ekimen honen bidez, Berrizko Udalak tailer gastronomikoen programa egonkor baten oinarriak ezarri nahi ditu, elikadura osasungarria, ikaskuntza partekatua eta adin ezberdinetako berriztarren arteko bizikidetza sustatzeko.

Izena emateko, karteleko QRa eta formulario hau​ erabil daitezke.