Eusko Jaurlaritzak 2026an hasiko ditu Durangoko institutuko beharrezko obrekin
MUGA HEZKUNTZA
Eusko Jaurlaritzako Hezkuntza Sailak Durango BHIrako hobekuntza integralerako proiektua idatzi du. Esku-hartze horretan frontoiaren estalkia berreraikitzea, lotura-atari estali berri bat eraikitzea, kanpoko ebakuaziorako eskailera metalikoa berritzea eta ikastetxeko patioak egokitzea aurreikusten da. Helburu nagusia instalazio irisgarriagoak, seguruagoak eta funtzionalagoak bermatzea da, ikasleen eta hezkuntza-langileen egungo beharretara egokituta.
Mireia Elkoroiribe alkateak, Iasmina Gorroño zuzendariak eta Paul Ortiz de Murua zuzendariordeak bilera egin dute Iñaki Orbe Bizkaiko Hezkuntza ordezkariarekin eta bere taldearekin. Bertan, proiektuaren xehetasunak aztertu dituzte eta obren egutegia adostu dute, lanek ikasleen jardueran ahalik eta eragin txikiena izan dezaten.
1970eko hamarkadan eraikia, Durango BHI hezkuntza-erreferentea da herrian. Urteen joanarekin, instalazioek hainbat egitura nahiz funtzionaltasun arazo agertu dituzte, eta, horregatik, gaur egun esku-hartze sakona behar dute. Proiektuaren puntu nagusietako bat izango da frontoiaren estalkia osorik berreraikitzea, gaur egun iragazketek eta mantentze-lanetako zailtasunek espazioaren erabilera egokia oztopatzen baitute.
Era berean, barruko harmailak kenduko dira, espazio zabalago eta irisgarriagoa sortzeko, eta frontoiaren zorua berdinduko da, malda egokitu berriekin.
Beste hobekuntza aipagarri bat frontoiaren eta Batxilergoko eraikinaren arteko lotura estalia eraikitzea izango da. Elementu arkitektoniko berri honek bi espazioen arteko pasabide estalia, segurua eta irisgarria ahalbidetuko du, baita baldintza klimatologiko txarretan ere.
Gaur egun oxidazio- eta irristadura-arazoak dituen ebakuaziorako eskailera metalikoaren kanpoko zatia ere berrituko da. Segurtasuna hobetzeko, eskailera erabat estaliko da itxitura berriekin eta material irristagaitzekin.
PATIOA
Bestalde, ikastetxeko patioetan jarduketa integrala egingo da: zoladura berrituko da, maldak egokituko dira, eta sareta irristagaitzak zein irisgarritasun-araudiari egokitutako arrapalak jarriko dira.
Proiektua gauzatzeko aurreikusitako aurrekontu osoa 1.250.000 euro + BEZa da. Gaur egun, proiektua izapidetze administratiboaren fasean dago, eta obrak 2026ko azken lauhilekotik aurrera hastea aurreikusten da.
Mireia Elkoroiribe alkateak adierazi duenez, “Durango BHIrako hobekuntza integraleko proiektu hau Eusko Jaurlaritzak eta Durangoko Udalak gure gazteen hezkuntza-kalitatearekin eta segurtasunarekin duten konpromisoaren erakusgarri da. Gure herrian erreferente den ikastetxe honetan egingo diren esku-hartzeek ez dute soilik azpiegitura hobetuko, baizik eta ikasleentzat eta hezkuntza-langileentzat ingurune irisgarriago, erosoago eta seguruagoa ere bermatuko dute. 2024tik Eusko Jaurlaritzako Hezkuntza Sailarekin eta Begoña Pedrosa sailburuarekin elkarlanean lantzen ari garen proiektua da. Erakundeen arteko lankidetza funtsezkoa da lan hauek modurik eraginkorrenean gauzatzeko, ikasleei eta ikastetxeko langileei ahalik eta eragozpen gutxien sortuz. Ziur gaude hobekuntza hauek kalitate handiagoko eta egungo beharretara egokitutako hezkuntza eskaintzen lagunduko dutela», amaitu du.
El instituto se desliga del nombre Fray Juan de Zumárraga y pasa a llamarse Durango BHI
