60. DURANGOKO AZOKA: Kulturaren Jaialdia, Iratxe Reparazen kartel anitzak eta Palestinarekiko elkartasuna bat eginda
MUGA DA!
Gaur goizean aurkeztu dute 60. Durangoko Azokaren edizioa Durangoko Landako Gunean, eta aurten, lehen aldiz, “Kulturaren Jaialdia” izena hartuko du ekimenak. Urtero bezala, euskal kulturaren plaza nagusia izango da abenduaren 5etik 8ra bitartean, eta lehen eguna, ohikoa den moduan, eskolei eskainiko zaie. Aurtengo ekitaldian, gainera, Palestinaren aurkako genozidioa salatzeko espazioa ere izango da. Aforoa eukiko du aurten ere.
Kulturaren jaialdia izango DA! IBAN GORRITI
Azokaren unibertso bisuala Iratxe Reparaz arbitzuarrak sortu du, eta aurten ez da kartel bakar bat izango, baizik eta kartel sorta bat, azokaren aniztasuna eta bizitasuna islatzeko asmoz. Artista nafarrak azaldu duenez, “azoka ezin da irudi bakarrean laburbildu; kulturaren mugimendua eta energia askatzen dituen topaleku bat da, eta horrek forma anitzak eskatzen ditu”.
Gerediaga Elkarteko koordinatzaile Beñat Gaztelurrutiak azpimarratu duenez, aurtengo azokak berebiziko garrantzia du testuinguru gatazkatsu honetan. “Ez da erraza jaialdi bat antolatzea samina zabaltzen den garai batean, baina horregatik, kulturaren bidez, kritika eta elkartasun mezua zabaldu nahi dugu. Palestinarekiko elkartasuna oso presente egongo da aurtengo azokako egunetan zehar, genozidioa behin betiko gelditzeko aldarria eginez”.
Prentsaurrekoan, Gaztelurrutiak gogoan izan du uztailaren amaieran hil zen Izaskun Ellakuriaga kazetaria ere, urte luzez Durangoko Azokaren bihotza izan zena. “Hitz hauek berarentzat dira. Aurtengo edizioan, euskal kulturaren alde hogei urtez egin zuen lana aitortu nahi dugu”.
Durangoko Azokaren antolakuntza Gerediaga Elkartearen esku dago, eta aurten 760.000 euro inguruko aurrekontua izango du. Euskal erakunde publiko nagusiek eta zenbait enpresa laguntzailek babestutako ekimena da. Hainbat diziplinatako artistak, sortzaileak eta euskaltzaleak bilduko dira aurten ere Durangon, euskal kulturaren ospakizun handi honetan, zeinak orain izen berria duen: Kulturaren Jaialdia.
