Gaur Asier Altuna izango da ‘Karmele’ filma aurkezten Durangoko Zugaza zineman

MUGA CINE

Astearte honetan, urriaren 14an, 20:15eko saioan, Durangoko Zugaza zinemak “Karmele” filmaren proiekzio berezi bat hartuko du, eta ondoren, solasaldia eskainiko da ikusleekin. Hasiera batean aktore durangarra Eneko Sagardoy bertan izango zela iragarri bazen ere, agenda-arazoengatik ezingo du parte hartu. Hala ere, filmaren zuzendaria, Asier Altuna, izango da bertan, eta ikus-entzuleekin sorkuntza prozesuaz eta filmaren atzean dagoen testuinguruaz hitz egingo du.

Eneko Sagardoy, Jone Laspiaur eta Asier Altuna.

‘Karmele’ filma Kirmen Uribe idazlearen ‘Elkarrekin esnatzeko ordua’ eleberrian dago oinarrituta. Istorioak Karmele Urresti erizain euskaldun gaztearen bizitza kontatzen du; bere senarrarekin, Txomin Letamendi musikariarekin batera, XX. mendeko gatazka handiek harrapatzen dute: Gerra Zibila, erbestea, Bigarren Mundu Gerra eta frankismoaren aurkako borroka. Maitasun, erbeste eta konpromiso politikoaren istorioa da, emakume baten ikuspegi intimo eta hurbiletik kontatua, bi su artean bizitzea egokitu baitzitzaion.